Ispanııada aptap ystyq sońǵy eki aıda 1180 adamnyń ómirin jalmady

ASTANA. KAZINFORM — Sońǵy eki aıda Ispanııada aýa temperatýrasynyń kóterilýi 1180 adamnyń ólimine sebep boldy. Bul týraly eýropalyq eldiń qorshaǵan orta mınıstrligi málimdedi.

Ispanııalyq derekkózderdiń habarlaýynsha, kóz jumǵandardyń basym kópshiligi — 65 jastan asqan adamdar, olardyń jartysynan kóbi — áıelder. Eń kóp zardap shekken óńirler — eldiń soltústiginde ornalasqan Galısııa, La-Rıoha, Astýrııa jáne Kantabrııa. Bul aımaqtarda dástúrli túrde jaz mezgilinde temperatýra tómen bolatyn, alaıda sońǵy jyldary kún kúrt ysyp ketken.

Batys Eýropanyń ózge de elderi sııaqty, Ispanııa da sońǵy aptalarda aptap ystyqtan zardap shekti. Temperatýra 40°C-tan (Farengeıt boıynsha 104 °F) jıi asyp otyrdy.

Qorshaǵan orta mınıstrligi Karlos ІІІ atyndaǵy densaýlyq saqtaý ınstıtýtynyń derekterine súıene otyryp, bıyl 16 mamyr men 13 shilde aralyǵynda ystyqqa baılanysty 1180 adam qaıtys bolǵanyn málimdedi. Al byltyr osy kezeńde bul kórsetkish nebári 114 adamdy quraǵan.

— Bul — ortasha temperatýranyń buryn-sońdy bolmaǵan deńgeıde kóterilýimen jáne aptap ystyqtyń saldarynan ólim-jitimniń kúrt artýymen sıpattalatyn erekshe jaǵdaı, — delingen mınıstrliktiń habarlamasynda.

Atalǵan kezeńde 76 ret aptap ystyqqa baılanysty eskertý jarııalanǵan. Byltyr dál osyndaı kezeńde birde-bir eskertý bolmaǵan.

Ótken jazda Karlos ІІІ atyndaǵy ınstıtýttyń derekteri boıynsha, Ispanııada aptap ystyqqa baılanysty 2191 adam kóz jumǵan. Bul kórsetkish bıylǵy ósimmen ushtasyp otyr.

Buǵan deıin, 9 shildede jarııalanǵan ǵylymı zertteý boıynsha, 2 shildege deıingi 10 kún ishinde Eýropanyń 12 qalasynda aptap ystyq saldarynan shamamen 2300 adam qaıtys bolǵan.