Ispanııada álemdegi eń bıik ǵıbadathananyń qurylysy aıaqtalady

ASTANA.KAZINFORM — Barselonadaǵy Kıeli Otbasy shirkeýiniń (Sagrada Famılııa) qurylysshylary ǵımarattyń ortalyq munarasyna kresttiń alǵashqy bóligin ornatty. Endi nysannyń bıiktigi 162,91 metrge jetip, ol álemdegi eń bıik ǵıbadathanaǵa aınaldy, dep jazdy BBC.

Bul rekord 1890 jyldan beri Ýlm soboryna tıesili bolǵan edi (XIV ǵasyrda bastalyp, XIX ǵasyrda aıaqtalǵan shirkeý), onyń bıiktigi – 161 metr.

Arhıtektor Antonıo Gaýdı jobalaǵan Kıeli Otbasy shirkeýiniń qurylysy 100 jyldan astam ýaqyt boıy júrip keledi, al onyń negizgi bóligi kelesi jyly tolyq aıaqtalýy tıis.

Aldaǵy birneshe aıda Isa Másihke arnalǵan ortalyq munaraǵa kresttiń qalǵan bólikteri ornatylady, sodan keıin onyń bıiktigi 172 metrge deıin jetedi.

Kıeli Otbasy shirkeýiniń alǵashqy irgetasy 1882 jyly qalanǵan, al kelesi jyly onyń qurylysyn jas arhıtektor Antonıo Gaýdı óz qolyna alǵan.

Keıin bul shirkeý Gaýdıdiń ómirindegi basty jobaǵa aınaldy: ol bastapqy jobany túbegeıli ózgertip, bastapqyda dinı qaıyrymdylyq qarjysyna salynyp jatqan shaǵyn ǵıbadathanany uly sáýlet týyndysyna aınaldyrdy.

1926 jyly Gaýdı qaıtys bolǵan sátte onyń jobalaǵan 18 munarasynyń tek biri ǵana turǵyzylǵan edi.

Kelesi jyldary qurylys birtindep jalǵasyp, ony qarjylandyrýmen jáne basqarýmen «Sagrada Famılııa qory» aınalysyp keledi. Qordyń qarajaty bıletter satylymynan jáne jeke donorlardan túsedi.

Shamamen bir jarym ǵasyr boıy qurylys túrli qıyndyqtarǵa tap boldy.

Ispanııadaǵy azamattyq soǵys kezinde katalondyq anarhıster shirkeýdiń jerasty krıptasyn órtep jiberip, Gaýdı jasaǵan syzbalar men maketterdi joıǵan.

Sonymen qatar, COVID-19 pandemııasy kezinde de jumystar ýaqytsha toqtatyldy. Qor ókilderi muny bıletter satylymynyń azaıýymen túsindirgen.

Alaıda ótken jyldyń qyrkúıeginde qordyń bas dırektory Haver Martınes Associated Press agenttigine bergen suhbatynda Isa Másihtiń ortalyq munarasy 2026 jyly — Gaýdıdiń qaıtys bolǵanyna 100 jyl tolǵanda — tolyq aıaqtalatynyn málimdedi.

Arhıtektordyń qurmetine, onyń súıegi jerlengen Kıeli Otbasy shirkeýiniń krıptasynda birneshe eske alý sharalary ótedi.

Qurylysshylar kelesi onjyldyqta shirkeýdi tolyǵymen aıaqtaý jumystaryn jalǵastyrady: jańa sándik elementter men músinder jasalyp, ǵıbadathananyń basty kireberisine baspaldaq salynady.

Eske sala keteıik, buǵan deıin Notr-Dam de Parı shirkeýiniń munaralary órtten keıin qaıta ashylǵanyn jazǵan edik.