Ispanııada aldaǵy aptada aýa temperatýrasy +45 gradýsqa deıin kóteriledi
ASTANA. KAZINFORM – Ispanııada kelesi aptada bıylǵy jazdaǵy eń kúshti ystyq tolqyny kútiledi. Eldiń Memlekettik meteorologııalyq agenttigi (AEMET) 22 shildeden bastap úshinshi aptap ystyq tolqyny bastalyp, keı óńirlerde aýa temperatýrasy +45 gradýsqa deıin jetýi múmkin ekenin málimdedi, dep habarlaıdy Euronews.
Meteorologtardyń málimetinshe, aýa temperatýrasy senbiden bastap kóterile bastaıdy. Ystyqtyń sharyqtaý shegi 23 shilde, beısenbige sáıkes keledi jáne qazirgi boljam boıynsha keminde sol kúnge deıin saqtalady.
– Qazirgi ystyq tolqyny Pıreneı túbeginiń batysynda qalyptasqan tómen qysym aımaǵynyń atmosferalyq bógelisimen baılanysty. Bul qubylys Saharadan ystyq ári qurǵaq aýa massasynyń soltústikke qaraı jyljýyna yqpal etedi, – dep habarlady AEMET.
Eń joǵary temperatýra Andalýsııada, Ebro ańǵarynda, Henıl ózeni alabynda jáne Maıorka aralynyń ishki bólikterinde tirkeledi. Bul óńirlerde birneshe kún boıy aýa temperatýrasy +40 gradýstan joǵary bolady dep kútilip otyr.
Sınoptıkter kúndizgi aptap ystyqpen qatar túnde de aýa temperatýrasynyń joǵary bolatynyn eskertti. Mundaı jaǵdaı adam aǵzasynyń qalpyna kelýine kedergi keltirip, ásirese qarttar men júrek-qan tamyrlary aýrýlary bar adamdar úshin qaýip tóndiredi.
Sonymen qatar orman órtiniń qaýpi eń joǵary deńgeıge jetedi. Taýly aımaqtarda jańbyrsyz naızaǵaı oınaýy múmkin, bul jańa órt oshaqtarynyń paıda bolý qaýpin arttyrady.
Bıylǵy jaz Ispanııadaǵy meteobaqylaý tarıhyndaǵy eń ystyq kezeńderdiń biri bolýy múmkin. 1 maýsym men 15 shilde aralyǵynda eldegi ortasha aýa temperatýrasy klımattyq normadan 3,3 gradýsqa joǵary bolyp, 2024 jylǵy rekordtan 0,4 gradýsqa asyp tústi.
Aptap ystyq bastalmaı turyp-aq elde eki iri orman órti jalǵasyp jatyr. Saragosa mańyndaǵy Ores eldi mekeni mańynda shyqqan órt shamamen 15,4 myń gektar aýmaqty sharpydy. Bul – bıyl Ispanııadaǵy eń iri orman órti. Órttiń jalpy perımetri 60 shaqyrymǵa jýyqtady.
Taǵy bir iri órt Kastılııa — La-Mancha avtonomııalyq óńirindegi La-Merla mýnıtsıpalıtetinde tirkeldi. Onda jalyn shamamen 6 myń gektar aýmaqty qamtyǵan. Bılik ókilderi órtti tolyq baqylaýǵa alý ázirge qıyn bolyp otyrǵanyn málimdedi.
