Ispanııada 600 keli kóne rımdik teńgeler tabyldy (FOTO)
ASTANA. QazAqparat - Ispanııanyń Tomares qalasynda qurylysshylar 600 kelige jýyq kóne rımdik tıyndardy tapty. Arheologtar monetalar III ǵasyrdyń sońy men IV ǵasyrdyń basynda jasalǵan dep sanaıdy. Bul týraly CNN habarlady.
Monetalar ótken aptanyń sársenbisinde qala shetindegi saıabaqtyń káriz jumystary barysynda tabylǵan. Jumysshylar qubyr astynan shuńqyr qazyp jatqanda ekskavator kúregi qatty nársege tıgen. Jumysty toqtatyp shuńqyrǵa úńilgende onda kóptegen qıraǵan qysh qumyralar baıqalǵan. Qumyralar bir metr tereńde jatqan. Tabylǵan 19 qysh ydystyń 10-y synyp, qalǵany aýzy jabylǵan kúıde búlinbegen. Ǵalymdar onyń ishinde ne bar ekenin ázirge bilmeıdi.
Synǵan ydystarda salmaǵy 8-10 gramdyq on myńǵa jýyq qola tıyndar bolǵan. Tıyndardyń keıbirine kúmis jalatylǵan.
Sevıleniń arheologııa murajaıynyń dırektory An Navarronyń aıtýyna qaraǵanda, qumyralar maı nemese sharap tasýǵa arnalmaǵan, kishkene. Tıyndardyń kóbi syzylmaǵanyna qarap qoldanylmaǵan dep paıymdalyp otyr. Ǵalymdar ony salyq tóleýge nemese áskerılerdiń aqysyna arnalǵan dep sanaıdy.
