Ispanııada 400 jyl buryn joǵalǵan pesanyń qoljazbasy tabyldy
ASTANA. 22 qańtar. QazAqparat - Ispanııa ulttyq kitaphanasynda Lope de Veganyń 400 jyl buryn jazylǵan pesasynyń qoljazbasy tabyldy, dep habarlaıdy Lenta.rý. Bul týraly kitaphana saıtynda habarlanǵan. Qoljazbanyń ózimen de sol saıttan tanysýǵa bolady.
«Áıelder men qyzmetshiler» («Mujeres y criados») dep atalatyn pesany Sırakýz ýnıversıtetiniń professory Alehandro Garsııa Reıdı taýyp alǵan. «Qala komedııasy» janrynda jazylǵan týyndy Madrıdti mekendegen apaly-sińili eki áıel men olardyń kúıeý jigitteri, qyzmetshileri týraly baıandaıdy.
Manýskrıpt kitaphanada 1886 jyldan beri saqtalyp keledi eken, ol munda gertsog Osýnnyń muraǵatynan kelip túsken. Osy ýaqytqa deıin shamamen 1631 jyly jazylǵan qoljazba Lopeniń esimimen baılanystyrylmaǵan edi. Zertteýshilerdiń aıtýynsha, qoljazba XVII ǵasyrdaǵy belgili antreprener Pedro Valdes qaǵazǵa túsirgen dep boljanǵan tizimnen quralady.
Kitaphana qyzmetkerleri jaqyn arada saıtta qoljazbanyń tolyq nusqasyn jarııalaıdy. Sondaı-aq shyǵarmany baspadan shyǵarý da josparlanýda. 2014 jyldyń kúzinde ıspandyq «altyn» ǵasyrdaǵy pesalardy sahnalaıtyn Fundacion Siglo de Oro teatr trýppasy bul týyndyny da sahna tórinen kópshilik nazaryna usynady.
Ispandyq dramatýrg, aqyn ári prozashy Lope de Vega (1562-1635) eki myńnan astam pesanyń avtory bolǵan, bizdiń ǵasyrymyzǵa onyń tek 425-i ǵana jetken. Ispan teatrynyń «altyn» kezeńin dramatýrgtyń esimimen baılanystyrady. Lopeniń kóptegen týyndylary kúni búginge deıin álem teatrlarynyń sahnalarynda qoıylyp júr.
