Ispanııada 16 jasqa tolmaǵandarǵa áleýmettik jelilerge kirýge tyıym salynbaq

ASTANA. KAZINFORM — Ispanııada 16 jasqa tolmaǵan jasóspirimderge áleýmettik jelilerge qoljetimdilikti shekteý josparlanyp otyr. Bul rette áleýmettik platformalar jas mólsherin tekserý júıelerin engizýge mindetteledi.

Agenttik Reuters-ke silteme jasap habarlaýynsha, bul týraly Ispanııa premer-mınıstri Pedro Sanches seısenbi kúni málimdedi. Ol qaýipsiz tsıfrlyq ortany qalyptastyrýǵa baǵyttalǵan birqatar sharany jarııalady.

Úkimet áleýmettik jelilerde óshpendilikke ıtermeleıtin pikirlerdiń, pornografııalyq kontenttiń jáne jalǵan aqparattyń keń taralýyna birneshe ret alańdaýshylyq bildirip, munyń jastarǵa keri áser etetinin atap ótken.

— Bizdiń balalarymyz eshqashan jalǵyz qalýǵa arnalmaǵan keńistikke tap bolyp otyr... Biz buǵan endi tóze almaımyz. Biz olardy tsıfrlyq «Jabaıy Batystan» qorǵaımyz, — dedi Sanches Dýbaıda ótken Dúnıejúzilik úkimet sammıtinde sóılep, basqa eýropalyq elderdi de osyndaı sharalar qabyldaýǵa shaqyrdy.

Aıta keteıik, jeltoqsan aıynda Aýstralııa 16 jasqa tolmaǵan balalarǵa áleýmettik jelilerdi paıdalanýǵa tyıym salǵan alǵashqy el atanǵan edi. Bul qadamdy osyndaı jas shekteýlerin engizýdi qarastyryp otyrǵan ózge memleketter de muqııat baqylap otyr.

Ispanııa premer-mınıstriniń aıtýynsha, kelesi aptada áleýmettik jeli basshylaryn zańsyz kontent pen óshpendilikke arandatý úshin jaýapkershilikke tartýdy kózdeıtin zań jobasy usynylady.Sonymen qatar algorıtmderdi manıpýlıatsııalaý men zańsyz kontentti taratý qylmys retinde qarastyrylmaq.

Budan buryn ótken aıda Frantsııa Parlamentiniń Tómengi Palatasy 15 jasqa tolmaǵan balalarǵa áleýmettik jelilerge kirýge tyıym salatyn zań jobasyn (130-ǵa qarsy 21 daýyspen) maquldaǵanyn jazǵan edik.