Ispanııada 1 mln astam adam zańdy mıgrant mártebesin alýǵa ótinish berdi
ASTANA. KAZINFORM – Ispanııada 1 mıllıonnan astam adam resmı mıgrant mártebesin alý úshin ótinish bergen, dep habarlaıdy Kazinform tilshisi.
Ispanııanyń Kóshi-qon mınıstrliginiń málimetinshe, ótinishterdiń kópshiligi elde birneshe jyldan beri turyp jatqan, biraq zańdy mártebesi joq shetel azamattarynan túsken.
Mundaı múmkindik ótken jyly qabyldanǵan kóshi-qon reformasy aıasynda berildi. Jańa erejeler elde turaqty turyp jatqan adamdarǵa zańdy mártebe alý rásimin jeńildetýge baǵyttalǵan.
Bılik bul bastama eńbek naryǵyndaǵy kóleńkeli jumyspen qamtýdy azaıtyp, áleýmettik qorǵaý júıesin nyǵaıtýǵa yqpal etedi dep esepteıdi. Sonymen qatar zańdastyrýdan ótken mıgranttar salyq tólep, áleýmettik saqtandyrý júıesine qatysa alady.
Ispanııa úkimetiniń baǵalaýynsha, jańa sharalar aldaǵy úsh jyl ishinde júzdegen myń adamnyń quqyqtyq mártebesin retteýge múmkindik beredi.
Alaıda bastama qoǵamda qyzý pikirtalas týdyrdy. Ońshyl saıası kúshter reforma zańsyz kóshi-qondy yntalandyrýy múmkin dep sanaıdy. Al quqyq qorǵaý uıymdary men kásipodaqtar bul sheshimdi elde burynnan turyp jatqan adamdardyń quqyqtaryn qorǵaýǵa baǵyttalǵan mańyzdy qadam retinde baǵalap otyr.
Ispanııa Eýropada zańsyz mıgranttardy zańdastyrýdyń eń aýqymdy baǵdarlamalarynyń birin júzege asyryp jatqan elderdiń biri sanalady.
Eske sala ketsek, buǵan deıin Qyrǵyzstan zańsyz mıgranttarǵa aıyppulsyz elden shyǵýǵa múmkindik beretinin jazdyq.
