Ispanııa vıtse-premeri temirjol apatynan keıin Kólik mınıstrligin basqarady
ASTANA. KAZINFORM — Ispanııa Premer-mınıstri Pedro Sanches birinshi vıtse-premer ári Ekonomıka mınıstri Karlos Kýerponyń Kólik jáne turaqty mobıldilik mınıstrliginiń mindetin ýaqytsha basqaratynyn málimdedi, dep habarlaıdy Kazinform agenttiginiń EO-daǵy menshikti tilshisi.
Bul jóninde úkimet basshysy 4 qarashada Palasıo-de-la-Monkloa saraıynda jasaǵan resmı málimdemesinde aıtty. P.Sanches qabyldanǵan sheshim týraly korol VI Felıpke málimdegen. Al taǵaıyndaý korol jarlyǵymen rásimdelip, sol kúni memlekettik resmı bıýlletende jarııalanady.
— Vıtse-prezıdent Kýerpo osy zań shyǵarý kezeńinde basqarý qabiletimen, tabandylyǵymen jáne bıik adamgershilik qasıetterimen kózge tústi. Mundaı qasıet qazirgi saıasatymyz ben elimiz úshin asa mańyzdy. Sondyqtan onyń mınıstr Pýente bastaǵan reformalardy jalǵastyryp, jumysty abyroımen atqaratynyna senimdimin, — dedi Pedro Sanches.
K.Kýerpo qazirgi ókilettigin saqtap, 29 qarashada ótetin jalpy saılaýdan keıin jańa úkimet qurylǵanǵa deıin eki mınıstrlikti qatar basqarady. Premer-mınıstr saılaýǵa az ýaqyt qalǵandyqtan, jańa mınıstrdi turaqty qyzmetke taǵaıyndamaı, vedomstvony ýaqytsha basqarýdy úkimettiń qazirgi músheleriniń birine júkteý týraly sheshim qabyldanǵanyn aıtty.
Bul sheshim Kólik mınıstri Oskar Pýenteniń 3 qarashada Kongresste otstavkaǵa ketýine baılanysty qabyldandy. Ol 28 qazanda Toledo provıntsııasyndaǵy Ýrde qalasynda Renfe jáne Iryo poıyzdary soqtyǵysyp, 69 adamnyń ómirin qıǵan temirjol apatynan keıin qyzmetten ketýdi jón kórgen. Mınıstr bul qadamyn apat qurbandaryna janashyrlyq tanytý, óz ustanymyna beriktik pen saıası abyroıdy saqtaý nıetimen túsindirdi.
Aıta keteıik, bul — 2026 jyly Madrıd — Andalýsııa joǵary jyldamdyqty temirjol jelisinde bolǵan ekinshi iri apat. Buǵan deıin qańtar aıynda Adamýs qalasynda poıyz apatynan 46 adam qaza tapqan edi.
Pedro Sanches Oskar Pýenteniń otstavkasyn rızashylyqpen qabyldap, onyń bul sheshimin qurmetteıtinin aıtty. Sondaı-aq mınıstrdiń qyzmetten ketýi Ispanııada temirjol júıesine ǵana emes, saıası jaýapkershilikke degen senimdi de nyǵaıtýǵa jol ashatynyn atap ótti.
2023 jyldyń jeltoqsanynan beri úkimettiń ekonomıkalyq blogyn basqaratyn K.Kýerpo endi apattan zardap shekkenderge kómek kórsetip, joǵary jyldamdyqty temirjol qatynasyn qalpyna keltirýmen aınalysady.
Eske sala keteıik, buǵan deıin Ispanııadaǵy poıyz apatynan qaza tapqan 56 adamnyń aty-jóni anyqtalǵanyn habarlaǵan bolatynbyz.
