Ispanııa Valensııadaǵy sý tasqynynan zardap shekken mıgranttarǵa elde turýǵa ruqsat beredi

ASTANA. KAZINFORM — Ispanııa úkimeti Valensııadaǵy sý tasqynynan zardap shekken 25 myń mıgranttyń elde zańdastyrylýyn jeńildetý úshin olarǵa bir jyl turýǵa jáne jumys isteýge ruqsat beredi, dep habarlaıdy Euronews.

Seısenbi kúngi Mınıstrler Keńesi bekitken tótenshe shara zardap shekken eldi mekenderde, atap aıtqanda Valensııa qaýymdastyǵynda zańsyz turatyndar úshin protsesti jeńildetýge baǵyttalǵan.

Bul — 29 qazanda 227 adamnyń ómirin qıǵan jáne kóptegen úı men kásiporyndardy qıratqan apattan keıin qalpyna keltirý josparynyń bir bóligi.

Mınıstrliktiń habarlaýynsha, tolassyz jaýǵan jaýyn saldarynan týyndaǵan haos kóptegen mıgranttyń Ispanııada zańdy turýyna, oqýyna jáne jumys isteýine qajetti talaptardy oryndaı almaýyna sebep boldy. Sol sııaqty, kóptegen jumys berýshiler sheteldik jumysshylardy jaldaý úshin barlyq qajetti bıýrokratııalyq protsedýralardan óte almady.

Sonymen qatar, sý tasqyny kezinde otbasy múshelerinen aıyrylǵan sheteldikter bes jylǵa elde turýǵa ruqsat alady.

Basqa eýropalyq elder mıgratsııa saıasatyn kúsheıtkenimen, Ispanııa ekonomıkalyq ósý men jumys oryndaryn qurýdyń negizgi faktory retinde sheteldik jumysshylardyń mańyzdylyǵyn basa kórsetýdi jalǵastyryp jatyr.

Budan buryn Valensııada 25 myń adam narazylyq sherýine shyǵyp, úkimettiń otstavkaǵa ketýin talap etkenin jazǵan edik. Aımaq basshysy Karlos Mazon men onyń úkimeti júzdegen adamnyń ómirin qıǵan sý tasqynynda der kezinde áreket jasamady dep aıyptaldy.