Ispanııa úkimeti Italııany birjaqty shekaralyq baqylaýdy toqtatýǵa shaqyrdy
ASTANA. KAZINFORM — Ispanııa úkimeti Italııa Ispanııadan kelgenderge qatysty engizgen ýaqytsha shekaralyq tekserýlerdi toqtatpasa, ózara áreket etý qaǵıdaty negizinde soǵan saı sharalar qabyldaıtynyn málimdedi. Bul týraly Anadoly agenttigi jazdy.
Ispanııa úkimetiniń málimdemesinde Rım bıliginiń Ispanııaǵa qatysty shekaralyq baqylaý engizý týraly sheshimi «birjaqty», «negizsiz» jáne «sońǵy tarıhtaǵy buryn-sońdy bolmaǵan qadam» dep ataldy.
Málimdemede bul shara jazǵy maýsymnyń qyzǵan shaǵynda myńdaǵan jolaýshynyń júrip-turýyn qıyndatyp, quqyqtyq belgisizdik týyndatyp otyrǵany aıtylǵan.
9 tamyzǵa deıin merzim berildi
Aqparatqa sáıkes, Italııaǵa tekserýlerdi 9 tamyz, jeksenbi kúniniń sońyna deıin toqtatýǵa ýaqyt berilgen.
— Eger Italııa bul qadamǵa barmasa, Ispanııa óz azamattarynyń múddesi men bedelin qorǵaý úshin soǵan saı sharalar qabyldaýǵa májbúr bolady, — delingen málimdemede.
Seýta bul sheshimge negiz bola almaıdy
Ispanııa Italııanyń atalǵan baqylaý sharalaryn Soltústik Afrıkadaǵy ıspan aýmaǵy Seýtaǵa zańsyz mıgranttardyń jappaı aǵylýymen baılanystyryp otyrǵan ýájin de joqqa shyǵardy. Málimdemede Seýtanyń Shengen júıesinde erekshe mártebege ıe ekeni jáne bul óńirge kirgen mıgranttardyń Eýropadaǵy vızasyz qozǵalys aımaǵynda erkin júre almaıtyny aıtylǵan.
30 shildede qalaǵa kelgen shamamen 72 myń mıgranttyń basym bóligi Marokkoǵa qaıtyp oralǵan.
Italııaǵa keletin zańsyz mıgranttardyń sany Ispanııadaǵy kórsetkishten eki ese kóp ekeni aıtylyp, soǵan qaramastan Ispanııanyń eshqashan Italııaǵa qatysty shekaralyq baqylaý júrgizbegeni atap ótildi.
Ispanııa premer-mınıstri Pedro Sanches osy máseleni talqylaý úshin mınıstrlerimen úılestirý keńesin ótkizdi. Al Italııa premer-mınıstri Djordja Melonıge shekaralyq tekserýlerdi toqtatyp, «ıspan azamattaryna Eýropanyń basqa azamattaryndaı qaraý» usynyldy.
Sonymen qatar Seýtaǵa jappaı ótý kezinde qaza tapqan 80 mıgranttyń denesi tabylǵany habarlandy. 1342 erip júrýshisiz kámeletke tolmaǵan mıgrant tirkelgen, olardyń jeke basyn anyqtaý jumystary jalǵasyp jatyr.
Buǵan deıin Ispanııa Marokkomen shekarada jańa bóget ornatýǵa kirisken bolatyn.
