Ispanııa temeki shegýge qatysty talaptardy kúsheıtpek
ASTANA. KAZINFORM — Ispanııa úkimeti temeki shegýge tyıym salynatyn qoǵamdyq oryndardyń tizimin aıtarlyqtaı keńeıtetin zań jobasyn maquldady. Tyıym kádimgi shylymmen birge elektrondy temekige de salynady, dep habarlaıdy BILD.
Jańa shekteýler meıramhanalar men qonaqúılerdiń ashyq terrasalaryna, avtobýs aıaldamalaryna, temirjol platformalaryna, ýnıversıtet aýmaqtaryna, sport nysandary men basseınderge, sondaı-aq jaǵajaılarǵa qoldanylmaq.
Densaýlyq saqtaý mınıstri Monıka Garsııa bul bastamanyń maqsaty halyqtyń densaýlyǵyn qorǵaý ekenin aıtty.
— Maqsatymyz — ortaq paıdalanylatyn keńistikterde taza aýa qalypty jaǵdaıǵa aınalýy tıis. Júkti áıelder men demikpesi bar adamdar meıramhana terrasalarynda ózge kelýshilerdiń temeki tútinimen demalmaýy kerek, — dedi mınıstr.
Zań jobasynda kámeletke tolmaǵandardyń temeki ónimderin paıdalanýyn odan ári shekteý jáne temeki men elektrondy temekiniń jarnamasyna tolyq tyıym salý da qarastyrylǵan.
Alaıda zań áli kúshine engen joq. Ol aldymen parlamenttiń maquldaýynan ótýi qajet. Sarapshylardyń pikirinshe, bul bastamaǵa eń úlken qarsylyq qoǵamdyq tamaqtaný salasynan bolýy múmkin. Óıtkeni jaz aılarynda ashyq alańqaılarda qyzmet kórsetetin oryndar Ispanııa ekonomıkasynda mańyzdy ról atqarady jáne jańa shekteýler olardyń jumysyna keri áser etýi yqtımal.
Ispanııa Densaýlyq saqtaý mınıstrliginiń málimetinshe, eldegi eresek turǵyndardyń shamamen 26%-y kún saıyn temeki shegedi. Temeki tutynýdyń saldarynan jyl saıyn 50 myńǵa jýyq adam kóz jumady.
Jalpy Ispanııada bar, meıramhana, kafe, túngi klýb pen kazıno sııaqty jabyq qoǵamdyq oryndarda temeki shegýge 2011 jyldan beri tyıym salynǵan.
Buǵan deıin Ázerbaıjanda elektrondy temekige tyıym salynyp, aıyppul engiziletini týraly jazǵan bolatynbyz.
