Ispanııa soty Shakırany aqtap aldy
ASTANA. KAZINFORM — Ispanııa soty ánshi Shakırany salyq alaıaqtyǵy isi boıynsha aqtap, oǵan qatelesip aıyppul retinde salynǵan 55 mıllıon eýrodan astam somany qaıtarýǵa sheshim qabyldady. Paıyzdardy qosqanda, jalpy qaıtarylatyn soma 60 mıllıon eýro, dep habarlaıdy Associated Press.
Іs 2011 jylǵy salyq daýyna qatysty boldy. Madrıdtegi sot Ispanııa bıligi ánshiniń elde salyq rezıdenti bolǵanyn dáleldeı almaǵan degen qorytyndyǵa keldi. Eldiń zańnamasyna sáıkes, azamat elde jylyna 183 kúnnen astam ýaqyt ótkizse, salyq rezıdenti bolyp sanalady. Sottyń anyqtaýynsha, salyq organdary Shakıranyń 2011 jyly Ispanııada tek 163 kún bolǵanyn rastaı alǵan.
Salyq qyzmeti ánshiniń sol ýaqytta Ispanııamen tyǵyz baılanysta bolǵanyn, onyń ishinde burynǵy fýtbolshy Jerar Pıke qatynastary jáne negizgi ekonomıkalyq qyzmeti osynda júrgizilgenin alǵa tartty. Alaıda sot Pıkemen qarym-qatynasty zań turǵysynan nekege teńestirýge bolmaıtynyn, sondaı-aq Shakıranyń «negizgi qyzmet ortalyǵy men ekonomıkalyq múddeleri» Ispanııada bolǵanyn dáleldeıtin derekter joq ekenin anyqtady.
— Qandaı da bir alaıaqtyq bolǵan emes jáne salyq agenttigi kerisinshe dáleldeı almady, óıtkeni bul jalǵan edi, — dedi Shakıra advokattary arqyly taratqan málimdemesinde.
Ánshiniń advokaty Hose Lýıs Prada sot sheshimin «aıtarlyqtaı zııan keltirgen 8 jyldyq synaqtyń» aıaqtalýy dep atady.
Bul Ispanııadaǵy Shakıraǵa qatysty jalǵyz salyq daýy emes. 2023 jyly 2012–2014 jyldarǵa arnalǵan 14,5 mln eýro salyqty tólemeý isi boıynsha ánshi prokýratýramen aldyn ala kelisim jasap, aıyptardy moıyndap, negizgi soma men paıyzdan bólek 7,3 mln eýro aıyppul tóledi.
Ánshi Paradise Papers qujattarynyń jarııalanýynda da ataldy, onda Madonna men Bono sııaqty belgili tulǵalardyń ofshorlyq shemalary ashyldy. Sońǵy on jylda Ispanııanyń salyq organdary sport juldyzdarynyń salyq tóleýin qatań baqylaýǵa aldy: fýtbolshylar Lıonel Messı men Krıshtıaný Ronaldý salyq tóleýden jaltarǵany úshin kináli dep tanyldy, biraq naqty túrme jazasyna tartylmady.
Aıta keteıik, Germanııa úkimeti semizdik deńgeıiniń ósimin tejeý jáne densaýlyq saqtaý júıesine túsetin aýyrtpalyqty azaıtý maqsatynda 2028 jyldan bastap densaýlyq saqtaý reformasy paketi aıasynda tátti sýsyndarǵa salyq engizýge nıetti.
