Ispanııa Shengen kelisimin ýaqytsha toqtatady
ASTANA. 27 sáýir. QazAqparat - Ispanııa EO elderi arasynda azamattardyń erkin júrip-turýy týraly Shengen kelisiminiń kúshin 28 sáýirden 4 mamyrǵa deıin Barselonada 3 mamyrda Eýropalyq ortalyq bank basshylyǵynyń otyrysy ótkizilýine baılanysty toqtatady, dep habarlady ITAR-TASS.
Vedomstvodaǵy derekkózderdiń túsindirýinshe, qabyldanǵan sheshim Katalonııa astanasyna júıege qarsy qozǵalystardyń birqatar jaqtaýshylarynyń kelýine bóget jasaý maqsatynda shekaralyq baqylaý engizýdi bildiredi, óıtkeni olar 3 mamyrda kóshede tártipsizdik áreketterine barýy múmkin. «Biz Barselonaǵa, ásirese Italııa men Grekııadan baqylaýǵa múmkindik bermeıtin elementter kelýi yqtımal degen málimet alyp otyrmyz», - dep túsindirdi mınıstrlikte.
Ispanııada Shengen kelisiminiń kúshi osymen ekinshi ret toqtatylyp otyr. Alǵashqy ret 2004 jyly murager hanzada Fılıpeniń nekege otyrýymen baılanysty Madrıd osyndaı qadamǵa barǵan bolatyn.
