Ispanııa sheneýnikteri temirjol daýyna baılanysty jumystan bosatyldy

ASTANA.QazAqparat - Ispanııada kólik salasyndaǵy eń joǵary laýazymdy eki sheneýnik otstavkaǵa ketti. Bul jergilikti temirjol týnnelderi úshin tym úlken bolyp shyqqan jańa poıyzdarǵa memlekettik tapsyrys tóńiregindegi janjalǵa baılanysty boldy, dep habarlaıdy QazAqparat VVS-ge silteme jasap.

Kólik mınıstri Isabel Pardo men «Renfe» memlekettik temirjol kompanııasynyń basshysy Isaıas Taboas bılik tarapynan nemquraılylyq deńgeıine qatysty qoǵam narazylyǵynan keıin otstavkaǵa ketýge sheshim qabyldady.

2020 jyly Ispanııa úkimeti soltústik aımaqtardaǵy Kantabrııa men Astýrııastaǵy eskirgen poıyz parkin jańartý týraly sheshim qabyldady. Ol úshin ıspandyq CAF óndirýshisimen zamanaýı qalaaralyq poıyzdar men tar tabandy poıyzdardy salýǵa shamamen 260 mıllıon eýroǵa kelisimshartqa otyrdy.

31 jańa poıyz 2024 jyldyń basynda qoldanysqa berilýi tıis edi, biraq osy jyldyń qańtarynda tapsyrys berilgen poıyzdar Ispanııanyń soltústigindegi taý týnnelderi úshin tym jalpaq ekeni belgili boldy.

Ispanııa úkimeti bul qatelik óndiristiń erte satysynda baıqalǵanyn jáne bul qarjylyq shyǵyndarǵa ákelmegenin aıtady. Alaıda, óndiristiń kesheýildeýine ákeldi jáne josparlanǵan 2024 jyldyń ornyna endi jańa poıyzdar 2026 jylǵa qaraı qoldanysqa beriledi.

Foto: EUROPA PRESS NEWS