Ispanııa Seýtaǵa mıgranttardyń jappaı ótýine baılanysty qylmystyq is qozǵady
ASTANA. KAZINFORM - Ispanııanyń Ulttyq soty shilde aıynyń sońynda mıgranttardyń Seýtaǵa jappaı ótýine baılanysty qylmystyq tergeý bastady, dep habarlaıdy Euronews.
Sýdıa Marııa Tardon shilde aıynyń sońynda mıgranttardyń Seýtaǵa jappaı ótýin aýmaqtyq tutastyqqa qarsy qylmys, abaısyzda adam ólimine ákep soǵý jáne qylmystyq uıymǵa qatysý faktileri boıynsha tergep jatyr. Sýdıa Marokko tarapynan úılestirilgen áreketterdiń belgileri bar ekenin atap ótti.
Ispanııa Ulttyq sotynyń sýdıasy Marııa Tardon shilde aıynda Seýtaǵa ondaǵan myń mıgranttyń kelýine baılanysty qylmystyq tergeý bastaý týraly sheshim qabyldady. Óz qaýlysynda ol «shetelde jasalǵan, elimizge jappaı ótý arqyly Ispanııanyń aýmaqtyq tutastyǵyna eleýli nuqsan keltirgen qylmystyq áreketter» bolýy múmkin ekenin kórsetti.
Tardonnyń bul sheshimi sýdıanyń buǵan deıin Ulttyq sottyń aýmaqtyq tutastyqqa qarsy qylmystardy, abaısyzda adam ólimine ákep soǵý jáne uıymdasqan qylmystyq toptardyń qyzmetine qatysty isterdi tergeýge quzyreti bar ekenin moıyndaýynan keıin qabyldandy. Osylaısha ol prokýratýranyń ustanymyn qoldady.
Sot qaýlysynda sýdıa 30 jáne 31 shildede bolǵan mıgranttardyń jappaı kelýiniń Ispanııanyń aýmaqtyq tutastyǵyna nuqsan keltirý úshin paıdalanylǵanyn aıtyp, bul protseske Marokko tarapynan «aıqyn ári daýsyz járdem» kórsetilgenin atap ótti.
Tergeý memlekettiń tynyshtyǵy men táýelsizdigine qarsy yqtımal áreketterdi, sondaı-aq shetel azamattarynyń quqyqtaryna, abaısyzda adam ólimine ákep soǵý jáne uıymdasqan qylmystyq toptardyń qyzmetine baılanysty qylmystardy qamtıdy.
Іs boıynsha sot óndirisi prokýratýrany qospaǵanda, ishinara qupııa túrde júrgiziledi. Sondaı-aq sýdıa oqıǵaǵa deıin bılik organdaryna túsken eskertýlerge qandaı reaktsııa bolǵanyn jáne mıgranttardyń jappaı ótýine jaýap berý úshin bólingen resýrstardyń qalaı paıdalanylǵanyn da tergemek.
Osyǵan deıin Marokkodan Seýtaǵa ótpek bolǵan 67 mıgrant qaza tapqany týraly jazdyq.
Sondaı-aq mıgranttardyń Seýtaǵa zańsyz kirý isine qatysty 25 adam sotqa tartylǵanyn habarladyq.
