Ispanııa Seýtadaǵy mıgratsııalyq daǵdarys qurbandary týraly jańa málimet jarııalady
ASTANA. KAZINFORM – Marokkodan Ispanııanyń Seýta eksklavyna zańsyz ótpek bolǵandar arasynda qaza tapqandar sany 72 adamǵa jetti, dep habarlaıdy DW.
Ispanııa úkimeti Seýtadaǵy mıgratsııalyq daǵdarysqa qatysty qurbandar sany jónindegi málimetti jańartty.
Avtonomııalyq qala úkimetiniń ókili Mıgel Anhel Peres Trıanonyń aıtýynsha, teńizden taǵy birneshe adamnyń máıiti shyǵarylǵannan keıin qaza tapqandar sany 72-ge jetken.
Ispanııa bıliginiń málimetinshe, qutqarýshylar Seýta jaǵalaýyndaǵy teńiz aýmaǵynda habar-osharsyz ketkenderdi izdeýdi jalǵastyryp jatyr.
Al Marokkonyń AMDH quqyq qorǵaý uıymy qurbandar sany budan áldeqaıda kóp bolýy múmkin ekenin málimdedi.
Uıymnyń baǵalaýynsha, qaza tapqandar sany shamamen 130 adamǵa jetýi yqtımal, al ondaǵan adam áli kúnge deıin iz-túzsiz joǵalǵandar qatarynda. AMDH jappaı kóshi-qonnyń sebepterin táýelsiz tergep, jaýaptylardy anyqtaýǵa shaqyrdy.
Apta basynan beri shamamen 60 myń adam Marokkodan Seýtaǵa teńiz jáne qurlyq arqyly jetýge áreket jasaǵan. Olardyń kópshiligi avtokólik shınalary men úrlemeli sheńberler sııaqty qoldan jasalǵan júzý quraldaryn paıdalanǵan. Ispanııa Іshki ister mınıstrliginiń deregine sáıkes, kelgenderdiń basym bóligi – jasy 30-ǵa tolmaǵan jastar.
Daǵdarysqa baılanysty Ispanııa bıligi 2021 jyldan beri alǵash ret qoǵamdyq tártipti qamtamasyz etý úshin Seýtaǵa áskerı qyzmetkerlerdi jiberdi.
Іshki ister mınıstrliginiń málimetinshe, mıgranttardyń basym bóligi Marokko aýmaǵyna qaıtarylǵan. Alaıda olardyń jappaı aǵylýyna ne sebep bolǵany áli de talqylanyp jatyr.
Ispanııa premer-mınıstri Pedro Sanches bolǵan oqıǵany shekara ashyldy dep adam tasymaldaýshylar taratqan qaýesettermen baılanystyrdy. Sonymen qatar birqatar buqaralyq aqparat quraldary Ispanııa Joǵarǵy sotynyń teńizde ustalǵan zańsyz mıgranttardy jedel qaıtarý tártibin shektegen sheshiminen keıin kóshi-qon aǵyny kúsheıgen bolýy múmkin degen boljam aıtyp otyr.
Qaıǵyly oqıǵadan keıin Ispanııa bıligi shekara ınfraqurylymyn kúsheıtýge kiristi. Seýta mańyndaǵy teńiz shekarasynda uzyndyǵy 500 metr bolatyn qalqymaly bóget pen ıakorge bekitilgen qalqymalar jelisin ornatý bastaldy. Bul jańa zańsyz shekara buzý áreketteriniń aldyn alýǵa baǵyttalǵan.
Eske sala keteıik, buǵan deıin Seýtadaǵy jappaı mıgratsııalyq daǵdarystan keıin óńirde qoǵamdyq tártiptiń birtindep qalpyna kele bastaǵany habarlanǵan bolatyn.
