Ispanııa premer-mınıstriniń zaıybyna sybaılas jemqorlyq jasady degen aıyp taǵyldy
ASTANA. KAZINFORM – Ispanııa astanasy tergeý sotynyń sýdıasy Hýan Karlos Peınado Ispanııanyń úkimet basshysy Pedro Sanchestiń zaıyby Begonıa Gomeske qatysty qylmystyq tergeýdi aıaqtady, dep habarlaıdy Kazinform-nyń EO-daǵy menshikti tilshisi.
Ispanııanyń birqatar jetekshi BAQ jazýynsha, Begonıa Gomeske Ispanııa Qylmystyq kodeksiniń tórt baby boıynsha resmı túrde aıyp taǵyldy: yqpalyn teris paıdalaný, bıznestegi sybaılas jemqorlyq, memleket qarajatyn jumsaý jáne zııatkerlik menshik nysandaryn qosa alǵanda zańsyz ıelený.
Sot sheshimi is boıynsha taǵy eki aıyptalýshyǵa da qatysty: bıznesmen Hýan Karlos Barrabes jáne sheneýnik Krıstına Alvares.
Sýdıa taraptarǵa aýyzsha tyńdaýlar ótkizý týraly nemese ádette sot qaraýyna deıin qorǵaý hattaryn daıyndaýǵa bes kún ýaqyt merzim berdi.
Bul rette sýdıa dáleldemelerdiń jetkiliksizdigine baılanysty aıyptaý qorytyndysynan ıntrýzızm (zańsyz kásibı qyzmet) týraly bap boıynsha aıypty alyp tastady.
Tergeý amaldary 2024 jyldyń sáýirinde Manos Limpias qoǵamdyq uıymynyń shaǵymynan keıin bastalyp, eki jylǵa jýyq ýaqytqa sozyldy. Nazarda B. Gomestiń premer-mınıstrdiń zaıyby mártebesin óziniń bıznes múddelerin ilgeriletý úshin paıdalaný, Komplýtense ýnıversıtetindegi kafedraǵa demeýshilerdi tartý, sondaı-aq memlekettik qoldaý alǵan kásipkerlermen baılanysy bolýy múmkin degen máseleler boldy.
Qytaıǵa zaıybymen birge saparlaǵan premer-mınıstr Pedro Sanches seısenbi kúni eldiń sot júıesine senim bildirdi.
- Men sot júıesinen ádildikti qamtamasyz etýdi suraımyn. Ýaqyt barlyǵyn óz ornyna qoıatynyna senimdi bolǵandyqtan, basqa aıtarym joq, - dedi ol Qytaı tóraǵasy Sı Tszınpınmen kezdesýden keıin Beıjińde ótken baspasóz máslıhatynda.
Osyǵan deıin Ispanııa premer-mınıstri Pedro Sanches Lıvannyń «jańa Gazaǵa» aınalýyna jol bermeý qajet ekenin málimdedi.
