Ispanııa premer-mınıstri jappaı narazylyqtan keıin kezekten tys saılaý jarııalady
ASTANA. KAZINFORM — Ispanııa premer-mınıstri Pedro Sanches kezekten tys parlament saılaýyn jarııalady. Saılaý 29 qarashada ótýi tıis, dep habarlaıdy BILD.
Bul sheshimge deıin Sanches bastaǵan azshylyq úkimet turǵyn úı naryǵyndaǵy daǵdarysty eńserýge baǵyttalǵan eki zań jobasy boıynsha daýys berýde jeńilis tapqan. Buǵan qosa, eldiń ár óńirinde jaldaý aqysynyń qymbattaýy men turǵyn úı tapshylyǵyna qarsy jappaı narazylyq aktsııalary ótti.
Uıymdastyrýshylardyń málimetinshe, Madrıdtiń ózinde «Turǵyn úısiz birde-bir adam, adamsyz birde-bir baspana bolmasyn» degen uranmen shamamen 500 myń adam kóshege shyqqan.
Sońǵy ýaqytta Sanches Seýtadaǵy daǵdarysqa baılanysty da qysymǵa ushyrady. Oppozıtsııa onyń úkimetin Ispanııanyń osy eksklavyna mıgranttardyń jappaı aǵylýy týraly eskertýlerdi elemedi dep aıyptady.
Sanches 2018 jyly premer-mınıstr qyzmetine keldi. Ol saılaýda jeńiske jetý arqyly emes, sol kezdegi konservatıvti premer-mınıstr Marıano Rahoıǵa qarsy senimsizdik votýmyn sátti ótkizýdiń nátıjesinde úkimet basyna keldi. Halyqtyq partııa tóńiregindegi jemqorlyq daýyna baılanysty Sanches solshyl jáne óńirlik partııalardyń qoldaýymen úkimet qurdy. Ol kezde onyń Sotsıalıstik partııasy (PSOE) parlamenttegi sany jaǵynan ekinshi fraktsııa bolatyn.
Eske sala keteıik, senbi kúni Ispanııanyń ondaǵan qalasynda bılikten halyqqa qoljetimdi baspana máselesin sheshýdi talap etken jappaı narazylyq aktsııalary ótti.
