Ispanııa premer-mınıstri: Lıvannyń ekinshi Gazaǵa aınalýyna jol bermeımiz
ASTANA. KAZINFORM - Ispanııa premer-mınıstri Taıaý Shyǵystaǵy qaqtyǵysty toqtatý qajettigin aıtty, dep habarlaıdy Anadoly.
Ispanııa premer-mınıstri Pedro Sanches Lıvannyń «jańa Gazaǵa» aınalýyna jol bermeý qajet ekenin málimdedi.
Barselonada ótken «Eýropa tynysy» forýmynda qorytyndy sóz sóılegen Sanches Taıaý Shyǵystaǵy qaqtyǵysty toqtatýdyń mańyzyn atap ótti.
«Lıvannyń jańa Gazaǵa aınalýyna jol bermeýimiz kerek», – dedi ol.
Sonymen qatar Sanches Izraıldi halyqaralyq gýmanıtarlyq quqyqty óreskel buzdy dep aıyptady.
-Eger biz ózge elderdiń bizge senim artyp, qoldaý kórsetkenin qalasaq, Eýropa birizdi áreket etýi tıis. Sol sebepti keshe men Eýroodaq pen Izraıl arasyndaǵy seriktestik týraly kelisimdi toqtata turýdy usyndym. Óıtkeni Izraıl birqatar talaptardy, ásirese halyqaralyq jáne gýmanıtarlyq quqyqqa qatysty mindettemelerdi oryndamaı otyr», – dep atap ótti Ispanııa úkimetiniń basshysy Pedro Sanches.
Osyǵan deıin Izraıldiń Iranǵa shabýyldaryn toqtatqanymen Lıvandaǵy operatsııalaryn jalǵastyryp jatqany týraly jazdyq.
Iran Izraıldiń Lıvanǵa jasaǵan soqqylarynan soń Ormýz buǵazyn qaıta japty.
Izraıldiń Lıvan aýmaǵyna jasaǵan soqqylaryn BUU Bas hatshysy aıyptady.
