Ispanııa premeri EO men Izraıl arasyndaǵy seriktestik kelisimdi buzýǵa shaqyrdy

ASTANA. KAZINFORM — Ispanııa premer-mınıstri Pedro Sanches Eýroodaq pen Izraıl arasyndaǵy seriktestik kelisimdi toqtatýǵa úndedi, dep habarlaıdy DW.

— Halyqaralyq quqyqty nemese EO qaǵıdattaryn buzatyn úkimet onyń seriktesi bola almaıdy, — dedi ol Andalýsııadaǵy mıtıngte.

Politico basylymynyń jazýynsha, Ispanııa bul usynysty 21 sáýirde ótetin EO syrtqy ister mınıstrleriniń kezdesýinde resmı túrde kótermek.

Sanches EO-daǵy Izraıldiń eń qatań synshylarynyń biri sanalady. Buǵan deıin ol Izraıl premer-mınıstri Bınıamın Netanıahýdy Gaza sektorynda genotsıd jasady dep aıyptap, sondaı-aq AQSh pen Izraıldiń Iranǵa jasaǵan birlesken soqqylaryn synaǵan.

Óz kezeginde Izraıl genotsıd týraly aıyptaýlardy joqqa shyǵaryp, Gaza sektoryndaǵy áskerı áreketterdiń maqsaty HAMAS sodyrlaryn joıý jáne ızraıldik kepilge alynǵandardy bosatý ekenin málimdedi.

Politico málimetinshe, Madrıdtiń bul usynysy jaqyn arada qabyldanýy ekitalaı, óıtkeni kelisimdi toqtatý úshin EO-ǵa múshe barlyq 27 eldiń kelisimi qajet.

Aıta keteıik, EO men Izraıl arasyndaǵy assotsıatsııa týraly kelisim 1995 jyly jasalǵan. Qujatta adam quqyqtaryn saqtaý týraly tarmaq bar, ony buzý kelisimdi qaıta qaraýǵa negiz bola alady.

Buǵan deıin Ispanııa, Slovenııa jáne Irlandııa syrtqy ister mınıstrleri EO dıplomatııasynyń basshysy Kaıa Kallasqa joldaǵan hatynda Izraıldi osy kelisimdi buzdy dep aıyptaǵan.

Eske salsaq, Ispanııa premer-mınıstriniń zaıybyna sybaılas jemqorlyq jasady degen aıyp taǵylǵany belgili boldy.