Ispanııa ómir súrý uzaqtyǵy reıtınginde Japonııany basyp ozbaqshy - Business Insider
ASTANA. QazAqparat - Aldaǵy 20 jylda Ispanııa ómir súrý uzaqtyǵy boıynsha Japonııanyń ornyn basýy múmkin. Business Insiderbasylymynyń habarlaýynsha, The Lancet ǵylymı jýrnalynda jarııalanǵan maqalada Eýropanyń ońtústiginde ornalasqan bul memlekette 2040 jyly ómir súrý uzaqtyǵy 85,8 jas bolatyny aıtylǵan.
«Uzaq jyldar boıy Japonııa ómir súrý uzaqtyǵy boıynsha alda keledi. Degenmen, jaqynda bul orynǵa Ispanııa jaıǵasatyn bolady. Búkilálemdik ekonomıkalyq forýmnyń básekege qabilettilik týraly jahandyq baıandamasynda da Ispanııa halqynyń densaýlyǵy kúnnen kúnge jaqsaryp kele jatqany aıtylady. Al sońǵy júrgizilgen zertteýde Ispanııadaǵy ómir súrý uzaqtyǵy álem boıynsha birinshi orynǵa shyǵatyny jazylǵan. Sondaı-aq alǵashqy ondyqqa Sıngapýr, Shveıtsarııa, Portýgalııa, Italııa, Izraıl, Frantsııa, Lıýksembýrg, Avstralııa kiredi», delingen maqalada.
Avtordyń aıtýynsha, zertteý barysynda 195 memlekettiń málimetteri eskerilgen eken.
Al Japonııaǵa keletin bolsaq, ol elde endi jas analardyń jumys isteýine mán bere bastapty. Aıta keterligi, osy kúnge deıin Japonııa balaly áıelderdiń jumys isteýine qolaısyz memleket sanalyp kelgen edi. Al The New York Times jarııalaǵan maqalada búgingi tańda bul kózqarastyń ózgerip jatqany jazylypty.
Maqala jarty kún jumys isteıtin balaly jas ana - Hıromı Ottsýkıdiń oqıǵasynan bastalady. Aptasyna 15 saǵat qana jumys isteıtin onyń mansaby ósken, biraq óziniń aıtýynsha, kompanııada ony jaqtyrmaıtyndar qatary kóbeıgen.
«Sońǵy júrgizilgen zertteýlerge sensek, balasy bar áıelderdiń 71 paıyzǵa jýyǵy jumys isteıdi. Bul osy kúnge deıingi eń úlken kórsetkish. Degenmen, bul san óte úlken problemalardy jasyryp tur», dep jazady basylym.
Maqala avtorynyń aıtýynsha, bul problemalar er adam men áıelderdiń eńbekaqysynyń ártúrli bolýyna áser etip, áıeldiń jumys mansabyna keri áser etedi.
«Premer-mınıstr Sındzo Abe Japonııanyń ekonomıkasyn qaıta jandandyrý úshin balaly áıelderdiń jumys isteýine múmkindikterdi arttyratynyn aıtty. Degenmen, memlekette bul baǵytta progress baıaý júrip jatyr. Mysaly, Hıromı jumys isteıtin Isana.net kompanııasy áıelderge balalaryn jumys ornyna alyp kelýge ruqsat beredi. Biraq memleket boıynsha ondaı jaǵdaı kóp jerde jasalmaǵan. Bir jaǵynan, memlekette qyzmetkerler azaıyp jatqandyqtan, balaly áıelderdiń jumysqa turý kórsetkishi arta berýi múmkin», dep jazylǵan maqalada.
