Ispanııa mıgratsııalyq zańnamany Seýtadaǵy daǵdarys aıasynda reformalaıdy
ASTANA. KAZINFORM — Ispanııa úkimeti 25 tamyzda kóshi-qon jáne baspana berý salasyndaǵy zańnamany reformalaýǵa baǵyttalǵan zań jobasynyń aldyn ala nusqasyn maquldady. Qujat ulttyq zańnamany Eýropalyq Odaqtyń kóshi-qon jónindegi jańa paktisine sáıkestendirýdi kózdeıdi. Bul týraly Euronews jazdy.
Sol otyrysta Mınıstrler keńesi Seýtadaǵy kóshi-qon daǵdarysyna baılanysty jaǵdaıdy úılestirý úshin biryńǵaı basqarý organyn qurýdy resmı túrde bekitti. Daǵdarys 30 jáne 31 shildede mıgranttardyń jappaı aǵylýynan keıin kúrt shıelenisken. Bılik málimetinshe, sol kezde qalaǵa shamamen 80 myń adam kirgen.
Jańa qurylymdy aýmaqtyq saıasat jáne demokratııalyq jad mınıstri Anhel Vıktor Torres basqarady. Onyń quramyna Seýta úkimetiniń basshysy Hýan Hesýs Vıvas, qaladaǵy úkimet ókili Mıgel Anhel Peres Trıano, sondaı-aq Ulttyq barlaý ortalyǵynyń ókilderi kiredi.
Úkimet otyrysynyń aldynda premer-mınıstr Pedro Sanches Ulttyq qaýipsizdik keńesin shaqyrdy. Bul Seýtadaǵy jaǵdaıdy ulttyq qaýipsizdikke qatysty másele retinde resmı taný jáne keıinnen biryńǵaı basqarý organyn qurý úshin qajet bolǵan.
Bul sheshim daǵdarys bastalǵannan keıin bir aıǵa jýyq ýaqyt ótken soń qabyldanyp otyr. Buǵan deıin oppozıtsııa bılikti qajetti sharalardy qabyldaýdy sozyp jiberdi dep synaǵan bolatyn. Seýta basshysy Hýan Hesýs Vıvas ta jappaı mıgratsııa aǵymynyń saldaryn jergilikti bılik óz kúshimen eńsere almaı otyrǵanyn aıtyp, ortalyq úkimetti jaǵdaıdy baqylaýǵa alýǵa shaqyrǵan.
Birinshi vıtse-premer ári ekonomıka mınıstri Karlos Kýerpo buǵan deıin biryńǵaı basqarý organynyń qurylýyn daǵdarysqa qarsy is-qımyldyń «úshinshi kezeńi» dep ataǵan. Onyń aıtýynsha, alǵashqy kezeńde bılik mıgranttar aǵynyn tejeýge, ekinshi kezeńde gýmanıtarlyq kómek kórsetýge jáne kelgen adamdardyń óz erkimen elderine qaıtýyn uıymdastyrýǵa basymdyq bergen.
Kýerponyń málimetinshe, Seýta shekarasyn zańsyz kesip ótken adamdardyń 90 paıyzdan astamy qazirdiń ózinde óz erkimen shyqqan elderine qaıtyp ketken.
Endi bılik aldynda Ispanııada qalýǵa zańdy quqyǵy joq adamdardy elderine qaıtarý, kámeletke tolmaǵandar men halyqaralyq qorǵaýǵa úmitkerlerdiń isterin jedel qaraý, sondaı-aq Seýtanyń ekonomıkasy men áleýmettik salasyn qalpyna keltirý mindetteri tur.
Sonymen qatar maquldanǵan zań jobasy tek Seýtaǵa ǵana emes, Ispanııanyń basqa da óńirlerine qatysty ózgeristerdi qarastyrady. Qujatta mıgranttardy aldyn ala irikteýdiń jalpy eýropalyq rásimin engizý kózdelgen. Bul tártip Kanar araldarynyń jaǵalaýynda, sondaı-aq Seýta men Melılıa shekaralarynda qoldanylady.
Zań jobasyndaǵy negizgi ózgeristerdiń biri — halyqaralyq qorǵaý týraly ótinishterdi tikeleı shekarada qaraýǵa múmkindik beretin, 12 aptaǵa deıin sozylatyn shekaralyq rásim. Sonymen birge Seýtaǵa qajetti ınfraqurylymdy damytý úshin 25 mln eýro bólý josparlanyp otyr.
Bılik mıgratsııalyq daǵdarystan keıin Seýtany qalpyna keltirýge arnalǵan jeke ekonomıkalyq kómek paketin de ázirlep jatyr. Kýerponyń aıtýynsha, onyń kólemi shamamen 180 mln eýrony quraýy múmkin. Qarajat jergilikti bıznesti qoldaýǵa jáne qalanyń áleýmettik-ekonomıkalyq damýy jónindegi keshendi jospardy keńeıtýge baǵyttalady.
Alaıda bul kómek paketi boıynsha túpkilikti sheshim ázirge qabyldanǵan joq. Ony aldaǵy birneshe aptada kelisý josparlanyp otyr.
Eske sala keteıik, buǵan deıin Marokkoda mıgranttardyń Ispanııa baqylaýyndaǵy Seýtaǵa jappaı ótý áreketi toqtatyldy.
