Ispanııa mıgranttar legine baılanysty Seýtaǵa ásker jiberedi
ASTANA. KAZINFORM — Seýta bıligi anklavtaǵy kóshi-qon daǵdarysyna baılanysty Madrıdten tótenshe jaǵdaı rejımin engizip, shuǵyl sharalar qabyldaýdy surady. Sońǵy eki aptada anklavqa 2 myńǵa jýyq zańsyz mıgrant kirgen, dep habarlaıdy Euronews.
Ispanııa bıligi beısenbi kúni Soltústik Afrıkadaǵy Seýta anklavyna qaýipsizdikti kúsheıtý úshin áskerı kúshter jiberetinin málimdedi. Sebebi anklavqa kún saıyn júzdegen mıgrant kelip, jergilikti shekarashylar olardyń legin toqtatýǵa úlgermeı otyr.
Jergilikti ákimshiliktiń málimetinshe, teńiz arqyly shekarany zańsyz kesip ótý áreketteri kúnine shamamen 300-ge jetken jáne bul kórsetkish artyp keledi. Sońǵy 12 aıda osy baǵytpen ótpek bolǵan 60-tan astam adam kóz jumdy.
Seýta prezıdenti Hýan Hesýs Vıvas Ispanııa úkimetin elde tótenshe jaǵdaı jarııalap, avtonomııalyq qaladaǵy jaǵdaıdy tikeleı baqylaýǵa alýǵa shaqyrdy. Sondaı-aq ol jergilikti qyzmetterdiń shamadan tys júktemege tap bolǵanyn aıtyp, qosymsha qarjy men resýrstar bólýdi talap etti.
Alaıda Ispanııa Іshki ister mınıstrligi ázirge mundaı sheshimdi qabyldaýdan bas tartty. Vedomstvonyń túsindirýinshe, eldiń azamattyq qorǵanys týraly zańnamasynda kóshi-qon aǵyndary Ulttyq azamattyq qorǵaý júıesi aıasyndaǵy tótenshe qaýip-qaterler qataryna jatqyzylmaıdy.
Euronews málimetinshe, osy kúni Ispanııa men mıgranttardyń negizgi bóligi keletin Marokko zańsyz túrde Seýtaǵa jetken adamdardy jedel túrde Marokkoǵa qaıtarý týraly kelisimge qol jetkizdi.
Sońǵy eki aptada Seýtaǵa zańsyz jetkenderdiń sany shamamen 2 myń adamǵa jetken. Olardyń basym bóligi — jas er adamdar, sondaı-aq áıelder men balalar da bar. Alaıda olardyń sany kóp emes.
Buǵan deıin AQSh zańsyz mıgranttardy deportatsııalaý úshin memlekettik áýe kompanııasyn quratyny týraly jazdyq.
