Ispanııa men Eýroodaq 10 mln eýro turatyn kvanttyq sýperkompıýterdi iske qosty
ASTANA. KAZINFORM — Ispanııa men Eýropalyq odaq Barselonada quny shamamen 10 mıllıon eýro bolatyn jańa kvanttyq sýperkompıýterdi iske qosty, dep habarlaıdy Euronews.
Jańa júıe MareNostrum Ona dep atalady.
Ol Eýropanyń kvanttyq esepteýler ınfraqurylymynyń bir bóligine aınalady.
Sýperkompıýter ǵylymı zertteýlerdi jedeldetýge, jasandy ıntellektini damytýǵa jáne jańa kvanttyq tehnologııalardy ázirleýge múmkindik beredi.
Júıe Barcelona Supercomputing Center bazasynda jumysyn bastady.
Sýperkompıýterdi Qilimanjaro Quantum Tech kompanııasy ázirledi.
Jobany qarjylandyrýdy Eýropalyq komıssııa men Ispanııa úkimeti qamtamasyz etti.
Jańa qurylǵy ortalyqtaǵy burynǵy júıelerden erekshelenedi.
Aldyńǵy qondyrǵylar tsıfrlyq arhıtektýraǵa negizdelse, MareNostrum Ona analogtyq kvanttyq kompıýter retinde jasalǵan.
Júıeniń negizinde kýbıtter qoldanylady.
Kýbıt — bir mezgilde birneshe kúıde bola alatyn erekshe esepteý elementi.
Mundaı tehnologııa kúrdeli esepterdi dástúrli kompıýterlerge qaraǵanda áldeqaıda jyldam sheshýge múmkindik beredi.
Barselona sýperkompıýterlik ortalyǵynyń barlyq úsh kvanttyq kompıýteri Barselonadaǵy Torre-Jırona shirkeýinde ornalasqan.
Osy ǵımaratta MareNostrum sýperkompıýteriniń aldyńǵy býyndary da jıyrma jylǵa jýyq ýaqyt jumys istegen.
Keshenniń alǵashqy eki kvanttyq kompıýteri 2025 jylǵy aqpanda paıdalanýǵa berilgen.
Sodan beri olar 4200 saǵattan astam esepteý jumysyn oryndaǵan.
Bul júıeler Ispanııanyń sýperkompıýterler jelisi iriktegen 53 ǵylymı jobada qoldanylǵan.
Jańa sýperkompıýter sondaı-aq EuroHPC Joint Undertaking jalpyeýropalyq kvanttyq esepteýler jelisiniń quramyna kiredi.
Eýroodaq bul ınfraqurylymdy amerıkalyq tehnologııalyq alpaýyttarǵa táýeldilikti azaıtý úshin damytyp jatyr.
Sonymen qatar uıym óz sýperkompıýterleri men jasandy ıntellekt ekojúıesin qalyptastyrýdy kózdeıdi.
Qazir EuroHPC alty kvanttyq kompıýter satyp alǵan.
Polsha, Chehııa jáne Germanııadaǵy júıeler qazirdiń ózinde jumys istep tur.
Olar biryńǵaı eýropalyq kvanttyq esepteýler jelisine biriktiriledi.
Eske salsaq, buǵan deıin Saudi Aramco men Pasqal kompanııalary Saýd Arabııasyndaǵy alǵashqy kvanttyq kompıýterdi iske qosqanyn jarııalaǵan edi.
Sondaı-aq eldegi sýperkompıýter qaı salalardaǵy máselelerdi sheshýge yqpal etetini týraly jazdyq.
