Ispanııa quramasyn «Barselonanyń» burynǵy bapkeri jattyqtyrady
ASTANA. QazAqparat - Fýtboldan Ispanııa qurama komandasyna Lýıs Enrıke bas bapker bolyp taǵaıyndaldy. Bul jaıly Marca-ǵa silteme jasap «SPORTINFORM» habarlaıdy.
Buǵan deıin Lýıs Enrıke bas bapker retinde «Barselona», «Roma», «Selta» komandalaryn basqarǵan. Ispanııa Fýtbol federatsııasy 48 jastaǵy bapkermen 2020 jylǵy Eýropa chempıonatynyń aıaǵyna deıin eki jyldyq kelisimshartqa qol qoıady.
Eske sala keteıik, Reseıde ótip jatqan Álem chempıonatynyń bastalýyna bir kún qalǵanda sol kezdegi bapker Hýlen Lopetegı qyzmetinen bosatylǵan edi. Onyń ornyna shuǵyl túrde Fernando Ierro taǵaıyndalǵan. Osy mýndıalda Ispanııa chempıonat qojaıyndarynan jeńilip, týrnırdi 1/8 fınal kezeńinde aıaqtaǵan bolatyn.
