Ispanııa quramasynyń kapıtany: Messı — fýtbol tarıhyndaǵy eń uly oıynshy
ASTANA. KAZINFORM — Ispanııa quramasynyń kapıtany Rodrıgo Ernandes 2026 jylǵy fýtboldan álem chempıonatynyń Argentınaǵa qarsy fınaly qarsańynda ótken baspasóz máslıhatynda óz oıymen bólisti. Fýtbolshy argentınalyq jankúıerlerdiń trıbýnadaǵy basymdyǵy týraly pikir bildirdi, dep habarlaıdy Sports.kz.
— Jankúıerlerdiń qoldaýy mańyzdy, biraq matchtyń taǵdyry alańda sheshiledi. Biz stadıondarda ıspanııalyq jankúıerlerdiń qoldaýyn sezindik. Eger argentınalyqtar kóbirek bolady deseńizder, jaraıdy. Biraq biz óz jankúıerlerimizge senemiz, — dedi Rodrı.
Jartylaı qorǵaýshy sońǵy jyldardaǵy Ispanııa quramasynyń damýyna da toqtaldy.
— Sońǵy jyldary Ispanııa quramasy turaqty túrde alǵa jyljydy. Buǵan deıin de aıtqanmyn, bul býyn óz izin qaldyrady. Álem chempıonatyn jeńý — kez kelgen fýtbolshy úshin eń úlken jetistik.
Barlyǵy osylaı órbýi tıis edi. Áýeli Ulttar lıgasyn jeńip, ózimizdiń deńgeıimizdi dáleldedik, keıin Eýropa chempıonatyn uttyq, endi álem chempıonatynyń fınalyna shyqtyq. Biz munymen toqtap qalmaımyz, aldymyzda úlken maqsattar tur, — dedi komanda kapıtany.
Ispanııa quramasynyń álsiz tusy týraly suraqqa Rodrı jaýap berýden bas tartty.
— Muny kópshilik aldynda aıtpaımyn. Áıtpese olar ony birden óz paıdasyna jaratyp alady, — dep ázildedi fýtbolshy.
Rodrı Argentına quramasynyń kapıtany Lıonel Messı týraly da pikir bildirdi.
— Messı — fýtbol tarıhyndaǵy eń uly oıynshy. Ol óz quramasyn Katardaǵy álem chempıonatynyń jeńisine jetkizdi, endi bul týrnırdiń de fınalyna alyp shyqty. Biz tek Leony emes, Argentına quramasyndaǵy basqa da myqty oıynshylardy eskerýimiz kerek, — dedi Rodrı.
Sondaı-aq fýtbolshy týrnırdiń basynda ózine aıtylǵan syndarǵa toqtaldy.
— Álem chempıonatynyń basynda BAQ-ta meniń negizgi quramda oınamaýym kerektigi týraly pikirlerdi estidim. Biraq men ózime senimdimin. Týrnır barysynda óz oıynymnyń da, búkil komandanyń da ilgerileýine kóńilim tolady. Bizdiń maqsatymyz — dál qazir turǵan deńgeıge jetý edi. Biz álem chempıony atanýdy kózdedik jáne oǵan qol jetkize alatynymyzdy bilemiz, — dep túıindedi Rodrı.
Aıta keteıik, Ispanııa men Argentına arasyndaǵy 2026 jylǵy álem chempıonatynyń fınaly Qazaqstan ýaqyty boıynsha 19 shildeden 20 shildege qaraǵan túni ótedi.
