Ispanııa: Kýmbre-Veha janartaýy atqylaýyn toqtatty
NUR-SULTAN. QazAqparat - Senbi kúni Ispanııadaǵy Kanar araldarynyń Úkimeti on kún boıy ǵalymdar kúkirt dıoksıdiniń eleýli shyǵaryndylaryn tirkemegennen keıin Palma aralynda janartaý belsendiliginiń aıaqtalǵany týraly jarııalady, dep habarlaıdy «QazAqparat» HAA Euronews-ke silteme jasap.
Kýmbre-Veha atqylaýyn 13 jeltoqsanda toqtatty, kóp uzamaı mamandar janartaý krateriniń ishine úńilip kórdi.
«Výlkannyń belsendiliginiń joqtyǵyna qaramastan, biz shydamdylyq tanytyp, ǵylymı-tehnıkalyq qaýipsizdik hattamalaryna sáıkes áreket ettik. Búgin men senimdi túrde aıta alamyn: janartaý tynyshtaldy», - dedi Kanar araldarynyń memlekettik basqarý, ádilet jáne qaýipsizdik departamentiniń basshysy Hýlıo Peres.
Kýmbre-Veha janartaýynyń atqylaýy Palma aralynyń tarıhyndaǵy eń uzaq atqylaý boldy: 85 kún 8 saǵat. Ony jergilikti turǵyndar jaqyn arada umyta qoımasy anyq. Tabıǵı apat sýarý júıeleri men joldardy buzyp, banan ekpeleri men júzimdikterdi oırandady. Lava men kúl aǵyndary 3000-ǵa jýyq ǵımaratty qıratty. 7 myńǵa jýyq adam evakýatsııalandy, janartaý atqylaýyna tikeleı baılanysty turǵyndar arasynda zardap shekkender joq. Avtonomııalyq qaýymdastyq bıligi ekonomıkalyq shyǵyndy júzdegen mıllıon eýroǵa baǵalap otyr.
Esterińizge sala keteıik, 50 jyl boıy tynysh jatqan Kýmbre Veha janartaýy 19 qyrkúıekte atqylaýdy bastaǵan bolatyn.
