Ispanııa - Qazaqstanmen qylmyskerlerdi ustap berý týraly shart jasasqan Eýropadaǵy tuńǵysh el
ASTANA. 2 mamyr. QazAqparat - Búgin Parlament Senatynyń jalpy otyrysynda depýtattar «Qazaqsan Respýblıkasy men Ispanııa Koroldigi arasyndaǵy ustap berý týraly shartty ratıfıkatsııalaý týraly» zańy qabyldandy.
Toqtala ketetin jaıt, Ispanııa Qazaqstanmen osyndaı shart jasasqan Eýropa elderiniń arasyndaǵy tuńǵysh memleket bolyp tabylady. Shart taraptardyń quzyretti organdary arasyndaǵy qylmystyq jaýaptylyqqa tartý úshin nemese ustap berýge ákep soǵatyn qylmystar úshin sot úkimin oryndaýda izdeýdegi adamdardy berý máselesi boıynsha qarym-qatynastardy retteıdi. Bul rette shart qylmystyq qýdalaýdan jasyrynyp júrgen, sonymen birge jazany óteýden jaltaryp júrgen adamdardy ustap berý máselelerin qarastyrady. Shart boıynsha QR Bas Prokýratýrasy quzyretti organ bolyp tabylady. Bas Prokýrordyń orynbasary Iogan Merkeldiń aıtýynsha, qujattyń qabyldanýy eki memleket arasynda qylmyskerdi ustap berý rásiminiń jaqsarýyna sep bolmaq. Onyń aıtýynsha, bundaı sharttardy Qazaqstan segiz memleketpen jasasqan. Bul rette taraptar jazbasha suraý salý boıynsha bir-birine ózderiniń aýmaǵynda qylmystyq qýdalaýdan jasyrynyp júrgen, sondaı-aq jazasyn óteýden jaltaryp júrgen adamdardy ustap berýge mindettenedi. Zańnamada ustap berý men odan bas tartý úshin naqty negizder kózdelgen.
«Shartty ratıfıkatsııalaý eki tarapqa adamdardy ustap berý máselelerinde biryńǵaı kelisilgen saıasatty ázirleýge, sondaı-aq eki memleket arasyndaǵy ustap berý rásimin jaqsartýǵa múmkindik beredi», - deıdi I. Merkel.
