Ispanııa qatelesip gollandııalyq narkobarondy túrmeden shyǵaryp jiberdi
ASTANA.KAZINFORM - Ispanııanyń Ádilet ókilderi bıýrokratııalyq shatasýdyń saldarynan gollandııalyq mıllıarder – esirtki baronyn túrmeden kezdeısoq bosatyp alǵanyna qatty uıaldy, dep jazady BBC.
Mocro Maffia esirtki karteliniń jetekshisi Karım Býıahrıchan aqsha jylystatýǵa qatysty bes jyldyq tergeýden keıin qańtarda Marbelede qamaýǵa alyndy. Ol Nıderland tarapynan ekstradıtsııalaý týraly ótinishti shatastyryp alǵandyqtan kezdeısoq bosatyldy. Ispanııa bıligi kartel basshysynyń qaıta tabylatynyna senimdi. Seısenbide jýrnalısterge sóılegen sózinde Ispanııanyń Ádilet mınıstri Felıks Bolanos esirtki satýshy quqyq qorǵaýshylar qolyna qaıta beriledi dep ýáde berdi.
Mocro Maffia – kokaın saýdasymen aınalysatyn Eýropadaǵy eń iri kartelderdiń biri. Kartel sońǵy 15 jylda Ońtústik Amerıkadan Eýropalyq Odaqqa mıllıardtaǵan eýroǵa esirtki tasymaldaǵan.
Olar Amsterdam men Rotterdam porttaryn kontınent boıynsha kokaındi tasymaldaý úshin paıdalanady. Sonymen birge Eýropada, Taıaý Shyǵysta jáne Marokkoda aqsha jylystatý operatsııalaryn júrgizedi.
Taksı degen laqap atpen belgili Býıahrıchan bıyl qańtarda taǵy bes adammen birge Ispanııada quny 50 mıllıon eýrodan asatyn 172 múlikti satyp alý arqyly aqsha jylystatqan degen aıyppen qamaýǵa alyndy. 46 jastaǵy ol Eýropadaǵy eń kóp izdeýde júrgen qashqyndardyń biri jáne Interpol ony kem degende bes jyl boıy ańdyp kelgen. Onyń aǵasy Samır 2014 jyly atyp óltirilgenge deıin Mocro Maffia bólimsheleriniń birin - Nıderland men Belgııada ornalasqan golland-marokko kompanııasyn qurǵan.
Býıahrıchan qaıtys bolǵannan keıin aǵasynyń ımperııasyn óz qolyna aldy degen boljam bar. Onyń ustalǵanyn bilgennen keıin Gollandııa bıligi ekstradıtsııalaý týraly ótinish berdi, ony bastapqyda Madrıdtegi ulttyq sot maquldady. Alaıda kartel basshysy qamaýda otyrǵan Malaga qalasynyń jergilikti bıligi oǵan Ispanııada aıyp taǵylýyn talap etti. Jergilikti BAQ keıin Madrıdtegi ulttyq sot sheshimniń kúshin joıǵanyn habarlady. 22 aqpanda Malaga soty Býıahrıchannyń qorǵaý toby bergen apellıatsııany qanaǵattandyrdy jáne eger ol 50 000 eýro kóleminde kepil tólese, ekstradıtsııalaýdy kútpeı bosatýǵa buıryq berdi.
Ispanııanyń El Pais gazeti sýdıalardyń kartel jetekshisiniń elden ketýi múmkin ekenin moıyndap, tólqujatyn tapsyrýdy buıyrǵanyn jáne ár 15 kún saıyn sotqa kelýin talap etkenin habarlady. Basylym Býıahrıchannyń 1 sáýirge deıin sotqa júıeli túrde kelgenin, sodan keıin ol joǵalyp ketkenin jazdy.
Mınıstr Bolanos Ispanııa bıligi jibergen bıýrokratııalyq qate týraly túsinik berýden bas tartty. Gaagadaǵy Nıderland prokýratýrasy Býıahrıchannyń nelikten túrmeden bosatylǵanyn túsinbeıtinin aıtty.
