Ispanııa Irannan elshilik qyzmetkerlerin evakýatsııalady
ASTANA. KAZINFORM — Ispanııa syrtqy ister mınıstri Hose Manýel Albares Tegerandaǵy Ispanııa elshiligi qyzmetkerlerin sátti evakýatsııalaǵanyn málimdedi, dep habarlaıdy TASS.
Syrtqy saıasat basqarmasy basshysynyń aıtýynsha, elshi men dıplomatııalyq ókildiktiń negizgi qyzmetkerleri aman.
— Biz jaqynda ǵana Irandaǵy Ispanııa elshiligin sátti evakýatsııaladyq. Tegeranda qalǵan elshi men negizgi qyzmetkerler Ázirbaıjan shekarasynan ótti, — dedi Hose Manýel Albares.
Ol Ispanııanyń aımaqtaǵy basqa dıplomatııalyq mıssııalary, sondaı-aq daǵdarys ortalyǵy táýlik boıy jumys istep, jedel telefon jelileri arqyly qońyraýlardy qabyldaýdy jalǵastyratynyn aıtty.
Osyǵan deıin Iranda shabýyl saldarynan 201 adam qaza tapqany týraly jazdyq. Jergilikti buqaralyq aqparat quraldarynyń habarlaýynsha, taǵy 747 adam jaralanǵan.
Aıta keteıik, AQSh pen Izraıldiń shabýyldary Islam Respýblıkasynyń 32 provıntsııasynyń 24-ine áser etken. Izraıl áskerı málimetine sáıkes, shamamen 200 joıǵysh ushaq Irannyń batysy men ortalyǵyndaǵy zymyran keshenderi men áýe qorǵanys júıelerine soqqy jasaǵan. Bul operatsııa Izraıl áskerı-áýe kúshteri tarıhyndaǵy «eń aýqymdy áskerı ushý» dep atalǵan.
Eske sala keteıik, Irandaǵy 6668 azamattyq nysan AQSh pen Izraıldiń shabýylyna ushyrady.