Ispanııa Iranǵa qarsy amerıkalyq ushaqtar úshin áýe keńistigin japty
ASTANA. KAZINFORM - Ispanııa Iranǵa qarsy AQSh operatsııalaryna baılanysty óz áýe keńistigi men áskerı bazalaryn paıdalanýǵa shekteý engizdi. Bul sheshim qaqtyǵystyń ýshyǵýyn boldyrmaýǵa baǵyttalǵan, dep habarlaıdy BBC.
El premer-mınıstri Pedro Sanches soǵys bastalǵaly beri AQSh pen Izraıldiń soqqylaryn zańsyz dep atap, Madrıdtiń bul qaqtyǵysqa qatyspaıtynyn birneshe ret málimdegen. Qabyldanǵan shekteýler amerıkalyq áskerı avıatsııanyń Taıaý Shyǵysqa ushýyn qıyndatqanymen, tolyq toqtatpaıdy.
- Irandaǵy soǵysqa qatysty qandaı da bir áreketter úshin Moron men Rota áskerı bazalaryn paıdalanýǵa ruqsat bermeımiz, — dedi Ispanııanyń qorǵanys mınıstri Margarıta Robles.
Onyń aıtýynsha, Madrıd bul ustanymyn AQSh úkimetine bastapqy kezeńnen-aq ashyq jetkizgen.
Eldiń syrtqy ister mınıstri Hose Manýel Albares mundaı shekteýlerdiń maqsaty - qaqtyǵystyń odan ári ýshyǵýyna ákelýi múmkin áreketterdiń aldyn alý ekenin aıtty.
AQSh tarapy bul málimdemelerge ázirge pikir bildirgen joq. Alaıda buǵan deıin AQSh prezıdenti Donald Tramp Ispanııanyń Iranǵa qarsy soǵysqa qatysty ustanymyna baılanysty tolyq saýda embargosyn engizýi múmkin ekenin eskertken bolatyn.
Aqpan aıynyń sońynda bastalǵan AQSh pen Izraıldiń Iranǵa qarsy áskerı qımyldaryna qatysty Pedro Sanches eń belsendi syn aıtýshylardyń biri boldy. Ol bul soqqylardy «oılanbaı jasalǵan» ári «zańsyz» dep baǵalady.
Naýryz aıynda Ispanııa AQSh-qa Andalýsııa óńirinde ornalasqan Rota jáne Moron-de-la-Frontera áskerı bazalaryn paıdalanýǵa ruqsat bermegeni habarlanǵan.
Ótken sársenbide Sanches Irandaǵy operatsııalarǵa qatysty barlyq ushý josparlary, onyń ishinde áýede janarmaı quıýǵa arnalǵan ushaqtardyń reısteri de keri qaıtarylǵanyn málimdedi.
Osyǵan deıin Ispanııanyń AQSh tarapynan jasalǵan qoqan-loqyǵa jaýap bergeni týraly jazdyq.