Ispanııa hanshaıymy joıǵysh ushaqty basqarýdy meńgerip júr
ASTANA. KAZINFORM – Ispanııa taǵynyń murageri, Astýrııa hanshaıymy Leonor áskerı daıarlyq aıasynda joıǵysh ushaqtardy basqarý kýrsyn ótip jatyr. Bul týraly BILD habarlady.
Ol birneshe kún buryn Los-Lıanos áýe bazasyna baryp, bolashaq ıspan ofıtserlerine arnalǵan Eurofighter joıǵysh ushaqtarynyń tanystyrylymyna qatysty.
Leonor 2023 jyldan beri koroldik dástúrge saı qurlyq áskeri, áskerı-teńiz floty jáne áýe kúshteri baǵyttary boıynsha keshendi áskerı daıyndyqtan ótip keledi.
Buǵan deıin onyń ákesi, Ispanııa koroli Fılıpp VI da dál osyndaı daıarlyqtan ótken. Bul eldiń Joǵarǵy bas qolbasshysy qyzmetin atqarý úshin qajet sanalady.
Los-Lıanos bazasynan keıin hanshaıym Talavera-la-Real áskerı bazasyna baryp, nusqaýshymen birge F-5 oqý-jattyǵý ushaǵymen áýege kóterilgen. Bul ushaqtar joıǵysh ushaq ushqyshtaryn daıarlaý úshin paıdalanylady.
Sondaı-aq Leonor buǵan deıin Pilatus PC-21 oqý ushaǵymen jeke ózi de ushý oryndaǵan. Bul onyń oqý baǵdarlamasy aıasyndaǵy ekinshi derbes reısi bolǵan.
Hanshaıym áskerı-teńiz flotyndaǵy daıarlyqtan da ótken. Ol 113 metrlik tórt dińgekti Juan Sebastián de Elcano oqý jelkendi kemesinde matros retinde qyzmet atqardy. Kýrs barysynda ol dińgekterge kóterilip, jelkenderdi jınaý jáne ornatý jumystaryn oryndaǵan.
Áskerı daıyndyq 2026 jyldyń jazynda aıaqtalǵan soń, Leonor Madrıdtegi Karlos III ýnıversıtetinde saıasattaný mamandyǵy boıynsha bilim alýdy bastaıdy. Ýnıversıtettegi oqý da onyń bolashaq monarh retindegi daıyndyǵynyń bir bóligi sanalady.
Aıta keteıik, Ispanııa premer-mınıstriniń zaıybyna sybaılas jemqorlyq jasady degen aıyp taǵyldy.
