Ispanııa halqy monarhııalyq bılikke qarsy narazylyq sherýine shyqty
ASTANA. QazAqparat - Ispanııanyń Madrıd, Barselona jáne basqa qalalarynda 10 myńnan asa adam monarhııalyq bılik júıesine qarsy narazylyqqa shyqty, dep jazady 24.kz.
Osynyń aldynda Korol Hýan Karlos taqtan túsip, uly Fılıpe hanzadany murager dep jarııalaǵan. Osyǵan oraı, bas kótergen belsendiler Ispanııanyń memlekettik qurylysyn aıqyndaý týraly referendým ótkizýdi talap etýde. Olar respýblıka qurýdy qalaıdy.
Osylaısha sherýshiler Býrbondar patshalyq áýletiniń bıligine tusaý salýdy kózdep otyr. Mundaı narazylyqqa sońǵy jyldary bolǵan shýly jaǵdaılar sebep. Hýan Karlostyń qyzy Krıstına hansha men onyń kúıeýi jemqorlyqqa qatysty is boıynsha tergelip jatyr.
Saıasattanýshylardyń paıymynsha, Fılıpe hanzada taqqa otyryp, Fılıp VI bolǵannan keıin, Marıano Rahoı úkimeti men Katalonııa bıliginiń til tabysýyna kómek jasap, aımaqtyń Ispanııadan bólinýine kedergi jasaýy múmkin.
