Ispanııa halqynyń sany 49,3 mıllıon adamnan asty

ASTANA. KAZINFORM — Ispanııa taǵy da demografııalyq rekord ornatty. Eldiń Ulttyq statıstıka ınstıtýtynyń (INE) deregi boıynsha, eldiń turaqty halqy 49,3 mıllıon adamǵa jetip, bul el tarıhyndaǵy eń joǵarǵy kórsetkish boldy, dep jazdy Kazinform agenttiginiń tilshisi.

Tek osy jyldyń ekinshi toqsanynda halyq sany 119 811 adamǵa artqan. Bul ósim shetelde týǵan turǵyndar sanynyń kóbeıýimen baılanysty. Al Ispanııada týǵandar sany, INE málimeti boıynsha, 18 120 adamǵa azaıǵan.

Eýropadaǵy halyqtyń qartaıýy men týý kórsetkishiniń tómendeýimen sıpattalatyn jaǵdaıǵa Ispanııa da tap bolyp otyr. Degenmen, el bul jaǵdaıdy ishinara ımmıgratsııa esebinen ótep otyr.

Sáýir men maýsym aılary aralyǵynda sheteldik turǵyndar sany 95 277 adamǵa ósip, jalpy sany 7 050 174 adamǵa jetti. Sonymen qatar, ıspan azamattyǵy bar adamdar sany 24 534 adamǵa kóbeıdi, bul negizinen natýralızatsııa (azamattyq alý) protsesimen baılanysty, al týý kórsetkishimen emes.

Elge eń kóp kelgender:

• kolýmbııalyqtar – 36 100 adam;

• marokkolyqtar – 25 000;

• venesýelalyqtar – 21 600.

Alaıda dál osy ulttar elden eń kóp ketkenderdiń qatarynda: Ispanııadan eń kóp emıgratsııa jasaǵandar – kolýmbııalyqtar (9 800), ıspandyqtar (9 700) jáne marokkolyqtar (9 200).

Ispanııadaǵy halyq ósimi barlyq aımaqtarda birkelki bolǵan joq. Eldiń barlyq avtonomdy qaýymdastyqtarynda jáne Seýta qalasynda ósim tirkelse, Melılıa qalasynda halyq sany sál azaıǵan.

Eń úlken salystyrmaly ósim tirkeldi:

• Aragonda – 0,91%;

• Valensııa qaýymdastyǵynda – 0,50%;

• Balear araldarynda – 0,42%.

Bul óńirler sońǵy jyldary ómir súrýge qolaıly aımaqtar retinde kóbirek ımmıgranttardy tartyp keledi.

Jyldyq esep boıynsha, Ispanııa halqy 508 475 adamǵa kóbeıip, pandemııa saldarynan keıingi kezeńde jáne jańa ımmıgranttardyń kelýimen kúsheıgen ósim úrdisin jalǵastyrdy.

Halyq sanynyń ósýimen qatar, Ispanııadaǵy úı sharýashylyqtarynyń sany da artyp otyr. Qazirgi tańda elde 19 596 099 úı sharýashylyǵy bar. Tek ekinshi toqsannyń ishinde 49 221 jańa úı sharýashylyǵy paıda boldy. Bul demografııalyq ózgeristermen qatar, birlesip ómir súrý men otbasy qurylymyndaǵy ózgeristerdi de kórsetedi.

Buǵan deıin Ispanııa jan basyna shaqqandaǵy JІÓ kórsetkishi boıynsha Japonııadan ozǵany habarlanǵan edi.

Sondaı-aq, anomaldi ystyq saldarynan Ispanııada 1060 adam kóz jumǵany aıtylǵan.