Ispanııa fýtbolyndaǵy qarajatty jymqyrǵan: Mıýnhende arab sheıhiniń uly ustaldy
ASTANA. KAZINFORM — Mıýnhen áýejaıynda Ispanııanyń «Malaga» fýtbol klýbynyń burynǵy ıesi, sheıh Abdýlla Ál-Tanıdiń uly Rakan Ál-Tanı ustaldy. Ol Dohaǵa ushpaq bolǵan, alaıda Eýropalyq order negizinde qamaýǵa alyndy. Endi Germanııa bıligi ony Ispanııaǵa ekstradıtsııalaý máselesin sheshýi kerek, dep habarlaıdy Bild.
Rakan Ál-Tanı, onyń ákesi jáne eki aǵasy «Malaga» klýbyn basqarý kezinde jasalǵan delingen qarjylyq zańbuzýshylyqtar boıynsha aıyptalýshylar qatarynda. Tergeý olardyń ústinen qarajatty ıemdený, qyzmettik mindetterin adal atqarmaý jáne klýb múddesine tıimsiz korporatıvtik sheshimder qabyldaý sııaqty aıyptar boıynsha is júrgizip jatyr.
Shilde aıynda Ispanııa soty otbasy múshelerin qamaýǵa alý týraly eýropalyq jáne halyqaralyq order shyǵarǵan. Buǵan deıin olardy uzaq ýaqyt boıy sot otyrystaryna shaqyrý múmkin bolmaǵan.
Ispanııa prokýratýrasy otbasynyń ár múshesine 14 jylǵa bas bostandyǵynan aıyrý jáne 18 jyl boıy kompanııalardy basqarýǵa tyıym salýdy talap etip otyr.
Rakan Ál-Tanı «Malaga» klýbynyń dırektorlar keńesiniń quramynda bolǵan. 2020 jyly qarjylyq zańbuzýshylyqtarǵa qatysty tergeý aıasynda sot Ál-Tanı otbasyn klýbty basqarýdan shettetken.
Aıta keteıik, Fılıppınniń memlekettik qarajatyn maqsatsyz paıdalandy jáne prezıdent Ferdınand Markosqa ashyq túrde qoqan-loqy kórsetti dep qamaýǵa alynǵan eldiń vıtse-prezıdenti Sara Dýterte kepilmen bosatyldy.
