Ispanııa – fýtboldan 2026 jylǵy álem chempıony
ASTANA. KAZINFORM – Álem birinshiliginiń fınalynda Argentınamen oınaǵan Ispanııa quramasy fýtboldan 2026 jylǵy álem chempıony atandy.
Kezdesý barysynda qarsylastar jyldam gol soǵýǵa tyrysty. Alǵashqy mınýttan ıspanııalyq qurama belsendilik tanytty. Argentına qaqpasy mańynda jıi boı kórsetip, qorǵaýshylardy kóp ábigerge saldy. Endigi bir sátte Ońtústik Amerıka qurlyǵynyń ókilderi qarymta shabýyldar uıymdastyrdy.
Ekinshi kezeńde ıspanııalyq fýtbolshylar qarqynyn arttyra tústi. Osyndaı sáttiń birinde argentınalyq Entso Fernandes qyzyl qaǵaz alyp, alańnan qýyldy.
Qosymsha kezeńniń 106-mınýtynda ıspanııalyq Ferran Torres mergendik tanytty.
Osylaısha Ispanııa quramasy qarsylasynan 1:0 esebimen basym túsip, 2026 jylǵy álem chempıony atandy.
Negizgi kezeń 0:0 esebimen teń aıaqtalyp, qosymsha kezeńge ulasty.
Bir aıdan astam ýaqytqa sozylǵan dúbirli dodada osylaısha máresine jetip, tarıh shejiresine jazylyp qalady. Fınalǵa jetken eki qurama da qazirge deıin chempıon atanyp úlgergen.
Ispanııa H tobynda eki jeńis, bir teń oıynmen 7 upaı jınady. Olar Ýrýgvaıdy 1:0, Saýd Arabııasyn 4:0 esebimen jeńip, Kabo-Verdemen 0:0 esebimen teń tústi. Odan keıin 1/16 fınalda Aýstrııany 3:0, 1/8 fınalda Portýgalııany 1:0, 1/4 fınalda Belgııany 2:1 esebimen jeńdi. Jartylaı fınalda Frantsııany 2:0 esebimen qapy qaldyrdy.
Argentınalyq fýtbolshylar J tobynda synǵa túsip, birde-bir upaıdan shashaý shyǵarǵan joq. Olar Aýstrııany 2:0, Aljırdi 3:0, Iordanııany 3:1 esebimen tize búktirip, óz tobynda toǵyz upaımen birinshi oryn aldy. Odan keıin argentınalyq fýtbolshylar Kabo-Verdeni qosymsha kezeńde 3:2, Egıpetti 3:2, 1/4 fınalda Shveıtsarııany qosymsha kezeńde 3:1 esebimen jeńdi. Olar jartylaı fınalda Anglııany 2:1 esebimen tize búktirdi.
Argentına 3 márte jeńis tuǵyryna kóterilse, Ispanııanyń bir márte mereıi ústem boldy. Jalpy qazirge deıin bar-joǵy segiz qurama chempıondyq ataqqa qol jetkizdi.
Qazirge deıin barlyǵy 13 qurama fınalda synǵa tústi. Olardyń arasynan Brazılııa, Germanııa, Italııa, Argentına, Ýrýgvaı, Frantsııa, Anglııa, Ispanııa chempıon atandy.
Al Nıderland – 3, Chehoslovakııa – 2, Vengrııa – 2, Shvetsııa men Horvatııa 1 márte fınalǵa shyqqanymen, kúmis júldeni qanaǵat tutty.
Aıta ketsek, 2026 jylǵy fýtboldan álem chempıonatynyń úshinshi oryn úshin ótken matchynda Anglııa quramasy Frantsııany 6:4 esebimen jeńip, týrnırdiń qola júldegeri atandy.
