Ispanııa «Evrovıdenıege» boıkot jarııalaýy múmkin

ASTANA. KAZINFORM — Ispanııa Mádenıet mınıstri Ernest Ýrtasýn eldiń «Evrovıdenıe» baıqaýyna qatysýy Izraıldiń sahnaǵa shyǵýyna tikeleı baılanysty ekenin málimdedi. Bul týraly Der Spiegel habarlady.

— Biz Izraıldiń kelesi «Evrovıdenıege» qatyspaýyn qamtamasyz etýimiz kerek. Eger ony jarystan shyǵara almasaq, Ispanııa baıqaýǵa qatyspaýy tıis, — dedi mınıstr.

Alaıda Izraıldiń baıqaýǵa qatysýy jónindegi túpkilikti sheshimdi «Evrovıdenıeni» uıymdastyratyn Eýropalyq habar taratý odaǵy (EBU) qabyldaıdy.

Buǵan deıin Irlandııa, Slovenııa, Islandııa jáne Nıderlandy da Izraıl qatysqan jaǵdaıda baıqaýǵa boıkot jarııalaıtynyn eskertken edi. Osylaısha Ispanııa ýltımatýmǵa qosylǵan besinshi el bolyp otyr.

Baıqaý erejesine sáıkes, ár eldiń ulttyq habar taratý kompanııalary jeltoqsan aıynyń ortasyna deıin uıymdastyrýshylarǵa ózderiniń «Evrovıdenıege» qatysý-qatyspaıtyny týraly resmı túrde habarlaýy qajet.

Al shilde aıynda EBU Izraıldiń qatysý máselesine qatysty uıymǵa múshe eldermen keńesýdi bastaǵanyn jarııalaǵan bolatyn.

Aıta keteıik, buǵan deıin «Evrovıdenıe-2026» baıqaýy Venada ótetini habarlanǵan bolatyn.