Ispanııa Eýropalyq Odaqty saǵat tilin jyljytýdan bas tartýǵa shaqyrady
ASTANA. KAZINFORM — Ispanııa premer-mınıstri Pedro Sanches Eýropalyq Odaqty maýsymdyq ýaqytty ózgertý tájirıbesinen túbegeıli bas tartýǵa shaqyrdy, dep habarlaıdy VVS.
Ol X platformasynda jarııalanǵan beıne úndeýde bıylǵy jyldyń 26 qazanyna josparlanǵan qysqy ýaqytqa kóshýdiń esh máni joq ekenin aıtty. Sanches Eýropalyq komıssııa 2018 jyly saǵatty ózgertýdi joıýdy usynǵanyn, biraq sodan beri eshqandaı sheshim qabyldanbaǵanyn eske saldy.
Premer-mınıstrdiń aıtýynsha, Ispanııa jáne Eýroodaqtyń basqa elderindegi azamattardyń kópshiligi ýaqyttyń ózgerýine qarsy.
Ol sotsıologııalyq saýalnamalar men ǵylymı zertteýlerdi mysalǵa keltirdi. Saǵattyń maýsymdyq ózgerýi energııany únemdeýge aıtarlyqtaı áserin tıgizbeıdi. Biraq halyqtyń densaýlyǵy men kúndelikti ómirine keri áser etedi.
20 qazanda Lıýksembýrgte ótken EO kólik, telekommýnıkatsııa jáne energetıka mınıstrleri sammıtiniń kún tártibine ýaqytty ózgertý máselesi engizilmegenimen, Ispanııanyń energetıka jónindegi memlekettik hatshysy Djoan Groızar ony talqylaýdy usyndy.
Eýropalyq komıssııa 2018 jyly júrgizgen saýalnamaǵa sáıkes, EO turǵyndarynyń 84% maýsymdyq ýaqyt ózgerisin joıýdy qoldady. 2024 jyly Germanııada respondentterdiń 74%-y osyndaı pikir bildirdi. Polsha, Fınlıandııa jáne basqa da birqatar elder de jazǵy jáne qysqy ýaqytty alyp tastaýdy qoldaıdy.
Jyl basynda Memleket basshysy Qasym-Jomart Toqaev biryńǵaı ýaqyt beldeýine qatysty suraqqa pikir bildirdi.