Ispanııa EO-ny Izraılge qarsy qatań sharalar qoldanýdy talap etti

ASTANA. KAZINFORM —  Joze Manýel Albares Brıýsseldegi Eýropalyq Odaq syrtqy ister mınıstrleriniń kezdesýinde Izraılge qatysty batyl sharalar qoldanýdy, onyń ishinde sanktsııalar engizýdi usyndy, dep habarlaıdy Anadoly.

Ol otyrys aldynda jýrnalısterge bergen suhbatynda Eýropalyq Odaq pen Izraıl arasyndaǵy áriptestik kelisiminiń ýaqytsha toqtatylýyn, qarý-jaraq embargosyn jáne jaýapty ızraıldik sheneýnikterge jeke sanktsııalar qoldanýdy talap etetinin aıtty.

— Eýropalyq Odaq Gazadaǵy genotsıdti jalǵastyryp jatqan Izraılge qarsy sanktsııalardy engizýde tabandylyq tanytýy tıis. Áıtpese, qalǵannyń bári beker bolady, — dep málimdedi Ispanııa Syrtqy ister mınıstrliginiń basshysy.

Budan buryn BUU Bas hatshysy Antonıý Gýterrısh AQSh-tyń Iranǵa qarsy jasaǵan áreketterine baılanysty tereń alańdaýshylyq bildirip, bul jaǵdaıdy halyqaralyq qaýipsizdik pen turaqtylyqqa qater tóndiretin qaýipti eskalatsııa retinde baǵalady.

Sonymen qatar Ózbekstan Taıaý Shyǵystaǵy qaqtyǵysty kelissóz arqyly sheshýge shaqyrdy.

Al G7 Izraılge qoldaý bildirip, Irandy Taıaý Shyǵystaǵy basty qaýip kózi retinde atady.