Ispanııa dopty ustaý jóninen álem chempıonattarynyń rekordyn ornatty
Kosta-Rıkany 7:0 esebimen oısyrata jeńgen Ispanııa dopty ustaý jóninen álem chempıonattarynyń rekordyn jasady.
Lýıs Enrıkeniń shákirtteri atalmysh oıynda dopqa 81,7 paıyz ıelik etti. Buǵan deıin dúnıejúzilik dodanyń rekordy Argentınaǵa tıesili edi. Argentınalyqtar 2010 jylǵy birinshilikte Grekııamen matchta oıyn ýaqytynyń 80,3 paıyz bóliginde dopty óz ıeliginde ustaǵan bolatyn. Úshinshi kórsetkish te ıspanııalyqtardyń úlesinde. Olar 2018 jyly Reseımen básekede 78,9 paıyz dopty baǵyndyrǵan edi.
Kosta-Rıkamen oıynda sondaı-aq ıspanııalyq jartylaı qorǵaýshy Gavı (18 jas, 110 kún) 1958 jylǵy chempıonattan bergi kezeńde gol soqqan eń jas fýtbolshy atandy.
Álem chempıonattarynyń tarıhynda tek eki oıynshy ǵana Gavıdiń aldynda tur. Bireýi – fýtbol koroli Pele (17 jas, 249 kún) 1958 jylǵy chempıonatta kózge tússe, ekinshisi – meksıkalyq Manýel Rosas (18 jas, 93 kún). Ol 1930 jyly gol soqty.
Eske sala keteıik, budan buryn fýtboldan álem chempıonatynda Frantsııanyyń Aýstralııany iri eseppen utqanyn jazǵan bolatynbyz.
Sondaı-aq Germanııa quramasy Japonııadan jeńilip qaldy.
Ispanııa Kosta-Rıkany 7:0 esebimen oısyrata jeńdi.
Belgııa Kanada quramasyn qapy qaldyrdy.