Ispanııa chempıonatynyń matchynda «Real» «Barselona» rekordyn qaıtalady
ASTANA. QazAqparat - Ispanııa chempıonatynyń tórtinshi týryndaǵy matchta madrıdtik «Real» «Espanol» komandasyn 2:0 esebimen jeńdi. Qatarynan 16 ret jeńiske jetken Zınedın Zıdanniń komandasy «Barselona» rekordyn qaıtalady.
Madrıdtik «Real» Ispanııa chempıonatynda 16 ret qatarynan jeńiske jetti. Osylaısha, madrıdtikter jeńisteriniń sanymen bes jyl buryn «Barselona» ornatqan rekordty qaıtalady. 2010 jyldyń qazan aıynan 2011 jyldyń aqpanyna deıin Hosep Gvardıola basqarǵan tusta katalonııalyqtar 16 matchty qatarynan utqan edi, dep habarlaıdy reseılik RBK agenttigi.
«Espanolǵa» qarsy matchta «Real» quramyndaǵy kolýmbııalyq jartylaı qorǵaýshy Hames Rodrıges pen frantsýzdyq shabýylshy Karım Benzema gol soqty. Olar negizgi quramda alǵash ret alańǵa shyǵyp otyr. Komandanyń bas bapkeri Zınedın Zıdan salqyn tıip aýyryp qalǵan Krıshtıaný Ronaldý men sanyn jaraqattap alǵan Garet Beıldy zapasta qaldyrdy.
Foto: Urbanandsport/ZUMAPRESS/ Global Look Press
