Ispanııa chempıonaty: «Real» «Barselonany» jeńip, kósh bastady

Ispanııa chempıonatynyń 11-týrynda ortalyq matchta katalonııalyq «Barselona» Madrıdtiń «Realyn» qabyldady, dep habarlaıdy Kazinform.

Birinshi taım basynda 6-mınýtta alań ıelerinen Ilkaı Gıýndogan «Barselonany» alǵa shyǵardy.

Ekinshi kezeńde 68-mınýtta «Real» sapyndaǵy jartylaı qorǵaýshy, 20 jastaǵy aǵylshyn Djýd Bellıngem alystan qaqpa buryshyn dál kózdedi. 92-mınýtta ol komandasyna jeńis áperdi – 2:1.

Osy oıynnan keıin «Real» 28 upaımen týrnır kestesinde kósh bastady. «Jıronanyń» da 28 upaıy bar. Al jańa maýsymdaǵy 14 matchta alǵash ret jeńilistiń aşy dámin tatqan «Barselona» (24 upaı) úzdik úshtikti túıindep tur.

Djýd Bellıngem jańa maýsymda barlyq týrnırlerdegi 13 matchta 13 gol jáne úsh nátıjeli pastyń avtory atandy. Bul – TOP-5-ke kiretin Eýropa birinshilikterindegi jartylaı qorǵaýshylar men qorǵaýshylar arasyndaǵy úzdik kórsetkish.

Aıta keteıik, Bellıngemdi «Real» «Borýssııadan» (Dortmýnd) 103 mln eýroǵa satyp alǵan edi. Onymen jasalǵan kelisimshart 2029 jyldyń maýsymyna deıin kúshinde bolmaq. Transfermarkt ınternet-portalynyń derekterine qaraǵanda, qazir oıynshynyń quny shamamen 120 mln eýroǵa baǵalanyp otyr.