Ispanııa aptap ystyqtan qorǵanatyn ulttyq jeli qurýdy qolǵa aldy

ASTANA. KAZINFORM — Ispanııanyń premer-mınıstri Pedro Sanches eldegi qoǵamdyq ǵımarattar bazasynda klımattyq panalardyń ulttyq jelisin iske qosý týraly málimdedi, dep habarlady BBC.

Joba kelesi jaz bastalǵanǵa deıin júzege asyrylady jáne kúsheıip kele jatqan anomaldy aptap ystyqtan qorǵaný retinde qolǵa alynbaq.

Sanchestiń aıtýynsha, alapat qurǵaqshylyq pen ekstremaldy joǵary temperatýralar sırek kezdesetin qubylys bolýdan qalǵan. Jaz mezgilinde barǵan saıyn qysqa merzimdi ystyq tolqyndar emes, maýsymnan tamyzǵa deıin uzaqqa sozylǵan temperatýralyq anomalııalar jıilep keledi.

Klımattyq panalar demalýǵa arnalǵan oryndary bar, aýamen salqyndatylatyn jáne tegin aýyzsýmen qamtamasyz etilgen ǵımarattar bolady. Olar, eń aldymen, sozylmaly aýrýlary bar adamdarǵa, qarttarǵa, sábılerge, sondaı-aq qarjylyq múmkindigi shekteýli, aptap ystyqqa tózimsiz toptarǵa arnalǵan.

Memlekettik meteorologııalyq AEMET agenttiginiń málimetinshe, osy jyldyń jazy Ispanııada baqylaý tarıhyndaǵy eń ystyq jaz mezgili bolyp tirkeldi. El aýmaǵynda úsh ret ystyq tolqyny baıqalǵan, olardyń bireýi 16 kúnge sozylyp, aýa temperatýrasy Tselsıı shkalasy boıynsha 45 gradýstan asyp ketken.

Eske sala ketsek, bıyl Shanhaıda aptap ystyq uzaqtyǵy boıynsha 100 jyldyq rekord jańardy.