Ispanııa AQSh tarapynan jasalǵan qoqan-loqyǵa jaýap berdi
ASTANA. KAZINFORM — Ispanııa úkimeti AQSh prezıdenti Donald Tramptyń Madrıdpen saýda-sattyqty tolyǵymen toqtatý týraly qoqan-loqysyna jaýap berdi, dep habarlaıdy agenttiktiń Brıýsseldegi menshikti tilshisi.
Jazbada «elde yqtımal áserlerdi azaıtý, zardap shekken sektorlardy qoldaý jáne jetkizý tizbegin ártaraptandyrý úshin qajetti resýrstar bar» delingen.
Eýropalyq baspasóz Ispanııa Eýrodaqtyń múshesi ekenin, sondyqtan Madrıdti ereksheleý áreketi Germanııa, Frantsııa jáne Italııa sııaqty basqa múshe memlekettermen túsinispeýshilik týdyratynyn jazady.
Madrıdtegi aqparat kózderi «eger AQSh Ispanııamen saýda qatynastarynyń sharttaryn ózgertkisi kelse, olar muny jeke kompanııalardyń avtonomııasyn, halyqaralyq quqyqty jáne Eýropalyq Odaq pen AQSh arasyndaǵy ekijaqty kelisimdi saqtaı otyryp jasaýy kerek» dedi.
Sondaı-aq «Ispanııa úkimetiniń mindeti — ózara qurmet pen halyqaralyq quqyqty saqtaýǵa negizdelgen elder arasyndaǵy erkin saýda jáne ekonomıkalyq yntymaqtastyqty ilgeriletý. Óıtkeni qazirgi qoǵam kóp máseleden góri, áriqaraı damýdy talap etedi jáne oǵan laıyq» dep jazdy.
Madrıd Iranǵa qarsy naýqan aıasynda amerıkalyq operatsııalar úshin Rota men Morondaǵy birlesken áskerı bazalardy paıdalanýǵa ruqsat berýden bas tartqannan keıin AQSh pen Ispanııa arasyndaǵy qarym-qatynas nasharlady.
Ispanııa mundaı áreketterdi birjaqty, zańsyz jáne BUU Jarǵysy men ekijaqty kelisimge qaıshy dep sanady.
Premer-Mınıstr Pedro Sanches Iranǵa qarsy soqqylardy «negizsiz jáne qaýipti áskerı aralasý» dep atady. Bul shıeleniske ákelip soqtyrady jáne turaqsyzdyq týdyrady. Tez arada shıelenisti azaıtýǵa, dıalog pen halyqaralyq quqyqty qurmetteýge shaqyrdy.
Buǵan jaýap retinde Donald Tramp 3 naýryzda Aq úıde (Germanııa kantsleri Frıdrıh Mertspen kezdesýinde) Ispanııany NATO-nyń «qorqynyshty» jáne «dostyq» odaqtasy retinde qatań synǵa alyp, ony áskerı bıýdjettiń jetkiliksizdigimen aıyptady. «Biz Ispanııamen jumys istegimiz kelmeıdi, barlyq saýda-sattyqty toqtatqymyz keledi» dep málimdedi. Sondaq-aq Qarjy mınıstri Skott Bessentke «Ispanııamen barlyq jumysty toqtatýdy» tapsyrdy.
Madrıd áleýetti áserlerdi azaıtý, zardap shekken sektorlardy qoldaý jáne jetkizý tizbegin ártaraptandyrý úshin qajetti resýrstary bar ekenin jáne erkin saýda men ekonomıkalyq yntymaqtastyqty jaqtaýdy jalǵastyratynyn atap ótti.
Aıta keteıik, Ulybrıtanııa AQSh-qa Iranǵa qarsy óz Áýe kúshteriniń bazalaryn paıdalanýǵa kelisti.