Ispan fýtboly qazaq jerinde: «Atletıko Madrıd» akademııasy bizge ne beredi
Fýtbol sporty tanymaldylyqtan kem emes, jankúıerleri jyl saıyn artyp otyrmasa, kemimeıdi. Emotsııaǵa bóleıtin juldyzdarǵa baı fýtbol qazir álemdegi №1 sport sanalady. Qazaqstanda da oǵan qyzyǵýshy jastar az emes. Taıaýda eldegi fýtbol jankúıerlerin qýantqan jańalyq jarııa boldy. Ispanııalyq «Atletıko Madrıd» fýtbol klýby Qazaqstanda akademııasyn ashpaq. Bul bastama keleshekte el fýtbolyna qalaı áser etpek? Kazinform tilshisiniń taldaýynan oqyńyz.
Dańqy jahanǵa jaıylǵan klýb
Taıaýda Memleket basshysy Qasym-Jomart Toqaev pen «Atletıko Madrıd» fýtbol klýbynyń prezıdenti Enrıke Sereso Torres kezdesken bolatyn. Osy jıynda atalǵan klýb Talǵar qalasyndaǵy Akbulak olımpıada ortalyǵynyń bazasynda fýtbol akademııasyn quratynyn málimdedi.
Jańalyq kópshilikti qyzyqtyrǵany anyq, «Atletıko Madrıd» klýbynyń da resmı saıty bul jańalyqty bólisti.
Komandany jankúıerlerge tanystyrýdyń qajeti joq, 120 jyldan astam tarıhy bar ujymnyń jetistikteri az emes. Birneshe márte Ispanııanyń ishki birinshiliginde chempıon atanyp, keıingi 14 jylda Eýropa lıgasynda 3 ret top jardy. Eń aıtýly doda Chempıondar lıgasynyń fınalyna deıin jetken kezderi bar.
Jalpy, Eýropadaǵy top klýbtar arasynda «Atletıko Madrıd» turaqty deńgeıdegi komanda sanalady. Ózge klýbtar birneshe jyl boıy dúrkirep, belgili bir kezeńde býyn almasýdyń qıyndyǵynan álsirep jatsa, atalǵan klýb nátıjesin bulaısha quldyratpaıdy. Ispanııa lıgasynda jyl saıyn alǵashqy tórttik qataryna enip, Chempıondar lıgasynyń pleı-off kezeńinde alpaýyt klýbtarǵa básekeles bolady. Atletıko Madrıd klýbynyń akademııasy osy kúni Ispanııada myqty oıynshylardy tárbıeleý jaǵynan «Barselona» men «Real Madrıdten» keıin úshinshi aıtylady.
Al klýb akademııasynan shyqqan juldyz oıynshylardy kópshilik jaqsy tanıdy. Olardyń arasynda qaqpashy Davıd de Hea, Koke, Gabı, Alvaro Morata men 2008 jyly eń úzdik fýtbolshyǵa beriletin «Altyn dop» júldesine basty úmitkerlerdiń biri bolǵan Fernando Torres te bar. ıAǵnı, akademııanyń tarıhy tereń, áleýeti zor. Áıtse de klýbtyń shet elderdegi akademııasynan shyqqan asa tanymal oıynshylar kezdespeıdi.
Komanda nege Qazaqstandy tańdady?
«Atletıkonyń» 17 elde akademııasy bar, basym bóligi kári qurlyq elderinde. Ózge qurlyqtan tek AQSh, Meksıka, Indonezııa, Kongo men Domınıkan Respýblıkasynan ǵana akademııasyn ashqan. Qazaqstan «Atletıko Madrıdtiń» tól akademııasyn ashqan 18-shi el retinde qatarǵa qosylǵaly tur.
Sonymen, «Atletıko Madrıd» akademııasynyń ashylýy bizge keleshekte qandaı artyqshylyqtar beredi. Sport sarapshysy Jandos Baıdildanyń aıtýynsha, qazir ıspanııalyq mamandar álem fýtbolynda suranysqa ıe, sol úshin aldaǵy ýaqytta olardyń jetekshiligimen qazaqstandyq jastar jaqsy nátıje kórsetýi múmkin.
– Meniń bilýimshe, «Atletıko Madrıd» akademııa ashýda TMD elderiniń arasynan birinshi bolyp Qazaqstandy tańdap otyr. Klýb basshylyǵy mundaǵy akademııanyń sapaly jumys isteýin qamtamasyz etedi, óıtkeni keleshekte basqa da elderden akademııa ashý úshin repýtatsııasy jaqsy bolýy kerek. Qazir álemde ıspan fýtboly óte abyroıly, bul elden shyqqan mamandarǵa suranys joǵary. Mysaly, «Manchester Sıtıdi» baptaıtyn Pep Gvardıola, «Arsenal» bapkeri Mıkel Arteta, «Baıerdi» bıikke shyǵarǵan Habı Alonso – ıspanııalyqtar. Biz aıtyp otyrǵan «Atletıko Madrıdtiń» rezervin jattyqtyratyn Fernando Torres pen Italııada bapkerlik mansabyn sátti bastaǵan Sesk Fabregas qazir Ispanııa fýtbolynyń órkendegen shaǵy ekenin dáleldeı tústi. Sondyqtan «Atletıko Madrıd» klýby akademııasynyń ashylǵany Qazaqstan fýtbolyna úlken serpilis beredi dep oılaımyn, – dedi ol.
Al klýbtyń Qazaqstandy tańdaý sebebine kelsek, oǵan birneshe faktorlar áser etken bolýy tıis. Birinshiden, Qazaqstan ulttyq quramasy keıingi 2 jyldyń ishinde fýtboldan jaqsy kórsetkishterge jetti. Danııa, Fınlıandııa sekildi azýly qarsylastardy jeńdi. Bıyl ótetin Eýropa chempıonatynyń toptyq kezeńine ótýge bir qadam qalǵanda ǵana súrindi. Kóp uzamaı Eýropa chempıonattarynda oınaıtyn klýbtar qazaqstandyq oıynshylarǵa qyzyǵa bastaǵanyn baıqadyq. Ekinshiden, ózge elder qazaqstandyq jankúıerlerdiń belsendiligin baıqady. El quramasynyń oıynshylary eýropalyq komandalarǵa aýysqanda, aýysýy múmkin degen tárizdi jańalyqtar taralǵanda azamattar áleýmettik jelide klýbtardy qolpashtap ala jóneldi. Óz kezeginde bul klýbtarǵa jarnama men tanymaldylyq turǵysynan taptyrmas tásil. ıAǵnı, Qazaqstanda akademııa ashý arqyly «Atletıko Madrıd» fanattary birshama kóbeıedi.
Qoryta aıtqanda, akademııa jumysynyń nátıjesin bolashaq kórsetedi. Áıtse de akademııa keleshektegi juldyz oıynshylarǵa baspaldaq bolaryna úmit basym.
