Ismaıl Hanııanyń qazasy: Túrkııa, Iran, ıemendik hýsıtter men «Hezbolla» Izraılge qoqan-loqy kórsetti
ASTANA. KAZINFORM - Irannyń jańa prezıdenti Masýd Pezeshkıan Tegerandaǵy HAMAS kóshbasshylarynyń biri Ismaıl Hanııanyń qazasyn qatań synǵa alyp, Iran «óziniń aýmaqtyq tutastyǵyn qorǵaıtynyn» aıtty, dep jazady BILD.
Pezeshkıan sonymen qatar «lańkestik basqynshylar ózderiniń áreketi úshin ókinetinin» aıtty.
Irannyń rýhanı kósemi Álı Hameneı Hanııanyń qazasy úshin «qatań jaza qoldaný — Tegerannyń mindeti» ekenin málimdedi.
Iemendik hýsıtterdiń ókilderi de Hanııanyń qazasyna qatysty pikir bildirdi. Olar HAMAS jetekshisiniń óltirilýin «aýyr terrorıstik qylmys» jáne «zańdy óreskel buzý» dep atady. Sonymen birge ıemendik hýsıtterdiń ózderi de sońǵy aılarda Qyzyl teńiz ben Aden shyǵanaǵyndaǵy kemelerdi Izraıl porttarynda baılanyp qalmaý úshin zymyranmen atqylaýǵa kóshken.
Hanııanyń qazasynan keıin «Hezbolla» lańkestik uıymy Izraılge qoqan-loqy jasap úlgerdi. Hezbollanyń málimdeýinshe, onyń qazasy «Izraılge qarsylyqty odan saıyn kúsheıte túsedi».
Buǵan qosa Túrkııanyń Syrtqy ister mınıstrligi de resmı túsinik berdi. Túrkııa Syrtqy ister mınıstrligi ókiliniń aıtýynsha, «Hanııanyń qazasy Gazadaǵy soǵysty halyqaralyq aýqymǵa keńeıtýge baǵyttalǵan».
Izraıldiń Mádenı mura mınıstri Amıhaı Elııagý óz kezeginde Hanııanyń qazasyna qýanyshty ekenin jasyrmady.
- Hanııanyń ólimi álemdi birshama jaqsartady, - dep jazdy ol X áleýmettik jelisinde.
Osyǵan uqsas pikirdi HAMAS sodyrlary Gaza sektoryna alyp ketken Matan Zangaýkerdiń anasy Eınav Zangaýker de bildirdi.
- Qanisher HAMAS jetekshileriniń orny tozaqta jáne biz olardyń óz jazasyn alǵanyn qalaımyz. Biraq biz Hanııanyń qazasymen toqtap, jaqyndarymyzdy tutqynda óltirýge jol bere almaımyz, — dedi Zangaýker.
BUU men NATO Ismaıl Hanııany óltirý týraly áli túsinik bergen joq.
Esterińizge sala keteıik, 2024 jyldyń 31 shildesinde Irannyń memlekettik buqaralyq aqparat quraldary Hanııanyń Iranda óltirilgenin habarlaǵan bolatyn. Ol jańadan saılanǵan prezıdent Masýd Pezeshkıandy ınaýgýratsııalaý rásimine qatysyp turǵan.
