Islandııanyń burynǵy prezıdenti HHІ ǵasyrdaǵy energetıkalyq syn-qaterlerdi atady
NUR-SULTAN. QazAqparat - Elordada ótip jatqan XII Kazenergy Eýrazııalyq forýmynda Islandııanyń burynǵy prezıdenti Oýlavıýr Ragnar Grımsson HHІ ǵasyrdyń negizgi energetıkalyq syn-qaterlerdi atady, dep habarlaıdy QazAqparat tilshisi.
«Biz HHІ ǵasyrdyń negizgi energetıkalyq syn-qaterlermen betpe-bet kelýimiz qajet. Bular óte aıqyn eki faktimen baıqalady. Birinshisi – adamzat tarıhynda biz alǵash ret jer jahan turǵyndarynyń jarysynan kóbi qalada ómir súretin ýaqytta tirlishik etip jatyrmyz. Shamamen 20 jyldyń ishinde álem turǵyndarynyń úshten ekisi Azııa, Afrıka jáne Amerıkanyń megapolıs qalalarynda turatyn bolady», - dedi ol.
Mártebeli meıman ekinshi fakti retinde álemde óndiriletin energııanyń 40-50 paıyzy qalalardy jylytý men salqyndatýǵa, al 20 paıyzy kólik túrlerine jumsalatynyn aıtty. Sondyqtan álem halqynyń úshten ekisi ómir súretin qalalardy jylytý ári salqyndatý máselesi 21 ǵasyrdaǵy energııa tutynýǵa qatysty eń úlken syn-qater bolmaq.
«Ókinishke qaraı energetıka salasyndaǵy qazirgi talqylaýlar men pikirtalastar aıasynda osynaý negizgi syn-qater kúntártibine shyǵarylmaı otyr. Eger buǵan barynsha jaýapkershilikpen qarap, jahandyq qorshaǵan ortany saqtap qalý úshin bul mindetti tıimdi sheshimder tabatyn bolsaq, jetistikke jeter edik. Áıtpese, ósip kele jatqan býyn úlken problemaǵa dýshar bolady. Dúnıejúzilik densaýlyq saqtaý uıymy da sońǵy jylda 7 mln adamnyń álemdegi shyǵaryndylar saldarynan qalalardyń lastanýy sebepti ólgendigin atap ótken edi. Bul da atalǵan syn-qaterdi jedel sheshý qajettigin aıqyn kórsetedi», - dedi Islandııanyń burynǵy prezıdenti.
