Islandııalyqtardyń basym bóligi EO-men kelissózderdi qaıta bastaýǵa qarsy daýys berdi
ASTANA. KAZINFORM — Islandııa turǵyndarynyń basym bóligi eldiń Eýropalyq odaqqa (EO) qosylýy jónindegi kelissózderdi qaıta bastaýǵa qarsy daýys berdi. Úkimettiń bastamasyn saılaýshylardyń 47,2%-y qoldasa, 52,8%-y qarsy shyqty, dep habarlaıdy Kazinform agenttigi Deutsche Welle-ge silteme jasap.
Jergilikti RUV medıakompanııasy 30 tamyzda daýys sanaý aıaqtalǵannan keıin jarııalaǵan referendýmnyń aldyn ala nátıjesine sáıkes, úkimettiń usynysyn saılaýshylardyń 47,2%-y qoldaǵan, al 52,8%-y qarsy daýys bergen.
Bıýlletenderdiń 0,7%-y jaramsyz dep tanyldy. Daýys berýge 270 myńnan astam adam qatysty. Bul — el halqynyń jalpy sany shamamen 400 myń adamy.
Islandııa 2009 jylǵy qarjylyq daǵdarystan keıin Eýropalyq odaqqa kirýge ótinish bergen. Alaıda 2013 jyly Reıkıavıkte eýroskeptıkter úkimet basyna kelgennen keıin kelissózder toqtatyldy.
Keıingi ýaqytta AQSh prezıdenti Donald Tramptyń Grenlandııany anneksııalaý jónindegi málimdemeleri, ınflıatsııanyń ósýi jáne joǵary paıyzdyq mólsherlemeler aıasynda kóptegen ıslandııalyq bul máselege qatysty kózqarasyn qaıta qarady. Degenmen eldiń EO-ǵa qosylýyna qarsylyq áli de basym. Ásirese, bul Islandııa ekonomıkasy úshin mańyzdy sanalatyn balyq sharýashylyǵy salasynda baıqalady.
Eger EO-men kelissózderdi qaıta bastaýdy qoldaýshylar jeńiske jetken jaǵdaıda, Brıýsselmen eldiń odaqqa qosylýy jóninde kelisim jasalýǵa tıis edi. Odan keıin Islandııanyń Eýropalyq odaqqa tikeleı qosylýy týraly taǵy bir referendým ótkizý josparlanǵan.
Islandııa Eýropalyq odaqtyń múshesi emes. Alaıda el Shengen aımaǵyna jáne adamdardyń, taýarlardyń, qyzmetter men kapıtaldyń erkin qozǵalysyn qarastyratyn Eýropalyq ekonomıkalyq aımaqqa kiredi.
Eske salaıyq, buǵan deıin Islandııa halqy 13 jyl buryn toqtatylǵan eldiń Eýropalyq odaqqa qosylýy jónindegi kelissózderdi qaıta bastaý máselesi boıynsha referendýmda daýys berip jatqanyn habarlaǵanbyz.
