01:00, 21 Naýryz 2021

Islandııada 6 myń jyl boıy qozǵalyssyz jatqan janartaý oıandy

REIKЬıANES. QazAqparat – Islandııanyń ońtústik-batysyndaǵy Reıkıanes túbeginde 6 myń jyl boıy qozǵalyssyz bolǵan Fagradalsfıadl janartaýy atqylaı bastady, dep habarlaıdy QazAqparat VVS agenttigine silteme jasap.

Islandııanyń meteorologııalyq basqarmasynyń málimetinshe, lava ońtústik-batys jáne batysqa qaraı baıaý aǵyp keledi. Onyń Grındavıka turǵyndaryna nemese asa mańyzdy ınfraqurylym úshin tikeleı qaýpi joq. Degenmen, meteorologtar halyqty laı kóshkinderi jóninde eskertýde.

«Aýanyń janartaý gazymen lastanýy boljanady. Adamdarǵa terezelerdi jabý, úıden shyqpaý jáne eshbir jaǵdaıda janartaý mańyna barmaý keńes etilýde. Qazirgi ýaqytta atmosferalyq aýanyń lastaný deńgeıi baǵalanýda. Jaǵalaý kúzetiniń tikushaǵy aýmaqty zerdeleý úshin jiberildi. Onyń bortynan alǵashqy fotolar jasaldy. Olardan janartaý atqylaǵannan keıin lavanyń tómen syrǵyp bara jatqanyn kórýge bolady. Alǵashqy málimetter boıynsha, janartaý jaryǵynyń uzyndyǵy – 500 metr», - dep jazady VVS.

Reıterstiń habarlaýynsha, sońǵy tórt aptada bul aýmaqta 40 myńnan astam álsiz jer silkinisi tirkeldi. Bul – kóp. Óıtkeni 2014 jyldan beri jyl saıyn 1 - 3 myń jerasty dúmpýi tirkelip keledi.

Fagradalsfıadl – Islandııanyń ońtústik-batysynda Reıkıanes túbeginiń ortalyǵynda ornalasqan janartaý taýy. Onyń bıiktigi - teńiz deńgeıinen 385 metr. Aınalasynda turatyn halyq sany az.

Reıkıanes túbeginde janartaý sońǵy ret 800 jyl buryn, al Fagradalsfıadl janartaýy 6 myńǵa jýyq jyl buryn atqylaǵan.

Vıdeo Oqıǵa Álem Álem jańalyqtary

Mıra Tólendiqyzy

Avtory