Islandııa jurty Eýroodaqqa qosylý-qosylmaý máselesi boıynsha referendýmda daýys berip jatyr
ASTANA. KAZINFORM — Islandııa turǵyndary 13 jyl buryn toqtatylǵan eldiń Eýropalyq odaqqa qosylýy jónindegi kelissózderdi qaıta bastaý máselesi boıynsha referendýmda daýys berip jatyr, dep habarlaıdy Kazinform agenttigi BBC-ge silteme jasap.
Senbi kúni Islandııa turǵyndary eldiń Eýropalyq odaqqa qosylý jónindegi 13 jyl buryn toqtatylǵan kelissózderdi qaıta bastaý kerek pe degen másele boıynsha referendýmǵa qatysyp jatyr. Saýalnama nátıjelerine qaraǵanda, daýys berý qorytyndysyn ázirshe boljaý qıynyraq.
Eýropalyq odaqqa qosylý jónindegi pikirtalastaǵy negizgi máselelerdiń biri — el ekonomıkasy úshin mańyzdy sala bolyp esepteletin balyq sharýashylyǵy.
Visir balyq aýlaý kompanııasynyń basshysy Petýr Palsson Eýroodaqqa múshelik Islandııadaǵy jumys oryndarynyń qysqarýyna jáne óndiristiń shetelge kóshirilýine ákelýi múmkin dep alańdap otyr.
— Eýropalyq odaqqa kirsek, eldiń saıasatyn solar aıqyndaıdy, — dep esepteıdi ol.
Eýroodaqqa qosylýǵa qarsylar eldiń balyqqa baı aýmaqtyq sýlaryn baqylaýdan aıyrylyp qalýy múmkin dep te qaýiptenedi. Olardyń pikirinshe, bul másele Islandııanyń egemendigi men óz saıasatyn derbes aıqyndaý múmkindigine tikeleı qatysty.
Al eýropalyq ıntegratsııany qoldaýshylar EO-men tyǵyz baılanys ulttyq valıýtany turaqtandyrýǵa jáne ómir súrý qunynyń qarqyndy ósýin tejeýge kómektesedi dep úmittenedi.
Eýroodaqpen qarym-qatynas máselesi Islandııa turǵyndaryn ondaǵan jyl boıy ekige bólip keledi. 2024 jyly kezekten tys saılaýdan keıin bılikke kelgen premer-mınıstr Krıstrýn Frostadoýttır bastaǵan solshyl-tsentrıstik úkimet 2027 jylǵa deıin referendým ótkizýdi ýáde etken.
Alaıda geosaıası jaǵdaıdyń ózgerýi bul ýádeniń oryndalýyn jedeldetti. BBC atap ótken faktorlardyń qatarynda Reseıdiń Ýkraınadaǵy soǵysy, Arktıkadaǵy básekelestiktiń kúsheıýi, AQSh prezıdenti Donald Tramptyń Islandııa taýarlaryna baj salyǵyn engizý týraly qoqan-loqqylary jáne onyń Grenlandııaǵa qatysty málimdemeleri bar.
Islandııanyń qarjy mınıstri Dadı Maýr Krıstoversson geosaıası jaǵdaıdyń tez ózgerip jatqanyn atap ótti.
— Geosaıası syn-qaterler turǵysynan jaǵdaı óte jyldam ózgerip jatyr, — dedi ol BBC-ge bergen suhbatynda.
Mınıstr Islandııanyń álemdegi orny týraly másele «aldyńǵy qatarǵa shyqqanyn» aıtty.
Aıta keteıik, Islandııa halqynyń sany 400 myńǵa jýyq.
Eske salaıyq, buǵan deıin Islandııa Eýropalyq Odaqqa kirý jóninde referendým ótkizýdi josparlap otyrǵanyn jazǵan edik.
